Euskaltzaindia eta Eusko Ikaskuntzak ez dituzte jaso oraindik Nafarroako Gobernuak eman ohi dizkien diru laguntzak. Nafarroako Gobernuak bi erakundeen sorreran parte hartu zuen. Egungo UPNren Gobernuak bestelako jarrera agertu du ordea. Nafarroako Gobernuak beste akordio bat nahi du akademiarekin, egungoa eleanitza baita eta EAEko aldundiak eta Eusko Jaurlaritza hartzen baititu bere baitan. Bestalde, UPNko Jaime Ignacio del Burgok Nafar Ikasketen Elkartea eratu du. Berau Eusko Ikaskuntzaren kontra doala adierazi du Roldan Jimeno EIko «RIEV» aldizkariko koordinatzaileak.

Unibertsitatean ikasketak euskaraz egiteko eskaintza eskasa da eta horren erakusle dugu asteotan Donostiako EHUko Arkitektura fakultateko ikasleak egiten ari diren itxialdi eta mobilizazioak. Aurten EHUk Arkitekturako 4. maila euskaraz egiteko aukera estrainekoz eskaini badu ere, ez du oraindik klase horiek emateko irakaslerik kontratatu. 3. mailan ere bi ikasgai gaztelaniaz egin beharko dituzte ikasleek arazo beragatik. Bestalde, euskararen normalizazioaren alde lan egitea xede duen Elkarlanean ikasle elkartea sortu dute Nafarroako Unibertsitate Publikoan.

Topagunea, Udako Euskal Unibertsitatea eta Iparraldeko zenbait elkarte diruz lagunduko ditu Udalbiltzak, euren lana bultzatzeko asmoz. Topaguneak 10 milioi pezeta jasoko ditu eta UEUk bi milioi pezeta. Iparraldeko elkarteei dagokienean, Kulturaldia eskuko programa, Euskal Irratiak, Ikas-Bi eta Euskal Haziak izango dira onuradunak: Guztira, 21,3 milioi pezeta jasoko dituzte Iparraldeko elkarte horiek.

Urriaren 19tik Debagoieneko zazpi herri aldizkari Goienkariaren barruan banatzen dira. Hala, asteroko maiztasunez herrietako hiru edizio egongo dira, bata Bergarakoa bestea Arrasatekoa eta azkena Leintzekoa izango da.