ek honela zioen euskararen kalitateari buruz «Gara»n:
«Hiztun eta idazle onengandik agian beti ez da hizkuntza ona ikasiko, baina txarrengandik inoiz ez. Gure komunikabideetan, telebista eta irratietan bereziki, hitz batean, jendaurrean agertzen diren hiztunek (...) oro har hizkuntz eredu nolabaiteko samarra erabiltzen dutela gauza jakina da (...). Erdaraz inoiz onartuko ez genituzkeen moduak erabiltzea normaltzat jotzen da. Egia da, gure hizkuntz egoera eta inguruko erdarena ez direla parekatzekoak baina euskararen munduak dena gutxiegi omen duela eta ezer baztertzeko ez ei dagoelakoa aitzakiatzat harturik, edonor eta edozein baldintzatan onartzeak ere, mesede adina kalte egin diezaguke. (...) Beste hizkuntzetan bezala, jendaurreko komunikazio-egintza edo lanetan esku hartzen dutenek laguntza eta prestakuntza bereziak beharko lituzkete gurean ere nork bere lanari etekin handiagoa ateratzeko ez ezik denon ondarea den hizkuntza altxorrari ekarpen gero eta hobeak egiteko. (...) Diodanak ez du zerikusirik zenbaitek hain higuingarritzat dauzkan «hizkuntz komisario»en lanarekin. (...) Horrek ere badu zerikusia Euskal Herria «eraikitzearekin», eta oso zuzena gainera».