Euskara ikastea gauza astuntzat jotzen duenak irakur beza AEK-k antolatutako barnetegien kanpainak dioena: «Uda ere garai aproposa da euskara ikasten jarraitzeko, aproposena agian inoiz baino denbora libre gehiago dugulako. Eta eguzkiak, beroak eta eguraldi onak sor dezaketen nagitasunaren aurrean eskaintza atsegin, freskagarri eta erakargarria prestatu du AEK-k, beti ere euskara ikastea eta udaz gozatzea bateragarriak izan daitezen. Berriro ere, euskara ikastea izango da uda honetarako planik hoberena».
Orain dela 20 urte AEK-k martxan jarri zuen egitasmo mota hau emankorra gertatu da hainbat eta hainbat euskaldunberrirentzat, euskara ikasteko erarik azkarrena eta eraginkorrena baita. Hala, formularen arrakasta ikusita, 1999an barnetegi eskaintza oparoa dugu udari begira. AEK-k berak, kasu, 700 ikasletik gora izan zituen iaz antolatutako barnetegietan, eta aurten milara inguratzea dute xede.
Formula sinplea da: 2, 3 edo 4 astez 30-40 ikasleko taldeak etxe batean biltzen dira euskara ikasi asmoz. Goizez eskolak ematen dira, baina horrez gain denetarako astia dago barnetegietan: txangoak, kultur ekintzak, parranda, tailerrak (antzerkia, dantza, ipuinak, eskulanak)... Helburu nagusia ahozko adierazpena edo mintzamena lantzea da.
Euskaltegiek kontu handiz aukeratzen dituzte barnetegietarako herriak: ingurune euskaldunetan kokatuak, bizitza sozial garrantzitsua daukaten herriak aukeratzen dira, eta aldez aurretik herrikoekin harreman sareak bilatzen dira ikasleak benetan herrikoekin mintza daitezen. 30 etxe inguru egokitu dira aurten Euskal Herriko gune euskaldunenetan.
AEK-k udaberrian ospatu den Korrikaren irudia erabili du orduan azaldutako konpromisoa barnetegietara eraman asmoz. «

» lelopean 16 barnetegi antolatu ditu uda honetarako beste horrenbeste herritan: Bizkaian Aulesti, Forua, Ondarroa eta Gatikan; Gipuzkoan Aduna, Aia, Amezketa, Azpeitia, Lizartza, Oiartzun, Zaldibia eta Zerainen; Nafarroan Arantza eta Goizuetan, baita Nafarroa Beherean (Urepelen) eta Zuberoan ere.
IKAk Doneztebe, Etxalar, Leitza, Lesaka eta Uztaritz herriak aukeratu ditu barnetegiak antolatzeko. Zenbait euskaltegi txikiagok euren herrietan bertan antolatzen ditu barnetegiak, hala nola Zornotzako Aurten Bai barnetegiak zein Lazkaoko Maizpide euskaltegiak. Bilboko euskaltegiek, jakina, inguru euskaldunagoetara jotzen dute mintza praktika egonaldiak antolatzeko. Bilbo Zaharra euskaltegiak Muxikan hartua du etxea, Ulibarri euskaltegiak Arantzazun, eta Uztarrik Artean. Gabriel Aresti euskaltegiak, berriz, ekainaren 14tik irailaren 11ra bitartean erabiliko du Sakanako Bakaikun duen etxea, uda osoan zehar hainbat txanda antolatuz.
Ikasle bakoitzaren euskara mailak bere neurriko barnetegia dauka, eta kasu gehienetan maila ertaina edo altua duten ikasleei zuzenduta badaude, hasi berrientzako barnetegi bereziak ere antolatzen dira, esate baterako Maizpidek, Aurten Baik, Uztarrik eta AEK-k Iparraldean antolatutakoak.
Adinaren araberako banaketarik ez da egiten normalean taldeak osatzerakoan, eta hala, adin guztietako jendea batzen da elkarbizitza aberastuz. Egonaldien prezioari dagokionez, ezberdintasunak dauden arren, barnetegi batean bi, hiru edo lau aste igarotzeak 40.000 eta 65.000 pezeta bitarteko prezioa du.

AEK-k barnetegi

gain zenbait eskaintza berezi prestatu du uda partea euskara maila hobetzeko aprobetxatu nahi dutenentzat. Hiru izango dira barnetegi berezi hauek: Mintzapraktika, Mendebaldeko euskara eta Familientzako barnetegia.
Mintzapraktika goi urratsetako ikasleei zuzenduriko tailerra da. Ahozko euskaran trebatzeko aitzakiarekin bideoa eta musika jorratzen dira antolatutako ekintzatan: gidoi eraikuntza, erreportajeak, bideoklipak, kantak... egiten dira.
Euskaltegian ikasitako euskara batuaren eta inguruko euskalkien arteko zubiak eraiki nahian antolatu du AEK-k Mendebaldeko euskara izeneko egitasmoa Bizkaiko Aulesti herrian. Hamaikatxo urte euskaraz ikasten jardun edota jada euskalduntze prozesua amaitua dutenei zuzendua dago abuztuaren 1etik 15era bitartean egingo den barnetegi hau. Ikasleak jatorrizko hiztunekin harremanetan jartzea ahalbideratuz, klasean ikusitakoa frogatu eta erabiltzea du xede.
Familientzako barnetegien helburua, berriz, guraso eta seme-alaben artean euskaraz aritzeko ohitura sendotzea da. Izan ere, asko dira seme-alabak euskal ereduetan matrikulaturik dituzten arren, euskaraz hitz egiteko zailtasunak dituzten gurasoak. Egun osoan euskaraz bizitzeko aukera izateaz gain, kezka bera duten gurasoak ezagutu eta elkar laguntzeko parada dute. Azpeitia, Goizueta eta Amezketan antolatu ditu AEK-k gurasoen barnetegiok. Udaleku baten antzera, haurrak begirale batekin daude gurasoak goizeko klaseetan dauden artean, eta arratsaldeetan familian