Iruñea eta Baiona lotuko dituen errepidea gorputza hartuz doa. Egun, zenbait aukera ditu foru gobernuak esku artean. Batzuk onartu eta beste zenbait baztertu ditu irizpide teknikoak, ekonomikoak eta trafikoari dagozkionak kontuan hartuz. Foru arduradunek azaroan jakinaraziko dute zein izango den Nafarroa eta Frantzia elkartuko dituen errepidea.
Nafarroako Gobernuak Nafarroa eta Frantzia lotzeko komunikazio bide posible guztiak aztergai izan ditu, autopista izan ezik. Foru Gobernuak beharrezkotzat jotzen du bi aldeak batuko dituen errepidea egitea, gaur egun bertoko errepideak kotxez gainezka egoten baitira. Guztira, 42 aukera aztertu dituzte Azpiegitura Saileko arduradunek. Horietatik, irizpide teknikoak, ekonomikoak eta trafikoari dagozkionak kontuan hartuz, bost dira, Nafarroako Gobernuaren ustez, burutu litezkeenak: hiru aukera Luzaide, Izpegi eta Aldude herrietatik igaroko liratekeen autobideak dira eta gainontzeko biak egun, Luzaide eta Aldudetik pasatzen diren errepideen banatzeak. Azken bietako bat aukeratzekotan errepide horiek hobetuko lirateke.
Pirinioak zeharkatuko dituen errepidea Sorogainetik igarotzearen aukera asko aztertu zuten foru arduradunek. Hala eta guztiz ere, azkenean aukera hori bertan behera utzi dute diru asko beharko lukeelako eta eragingo lukeen ingurugiro inpaktua oso handia izango litzatekeelako.

Ingurugiro irizpideari dagokionez, Luzaide litzateke aukerarik aproposena. Aukera horrek, 137 kilometroko luzera du eta Imarcoainen edo Iruñean du jatorria. Errozera heltzeko, Urroz edo Zubiritik igaroko litzateke. Aukera horren elementurik azpimarragarrienak Pirinioetan indusi beharko liratekeen bost tunelak dira. Bostek, guztira, 8.300 metroko luzera izango lukete. Luzaideko autobidea da tunel gutxien eskatzen dituena. Horrek errepiderik merkeena bihurtzen du Luzaidekoa.
Bestalde, Izpegiko autobidea egingo balitz, 11 tunel egin beharko lirateke eta 18 kilometro inguru indusi beharko lirateke. Are garestiagoa gertatzen da oraindik ere, Aldudekoa. Hamar tunel aurreikusten ditu aukera horrek, eta beraz, 33 kilometro inguru indusi beharko litzaizkieke Pirinioei.
Nafarroako Gobernuko teknikariek azaldu dutenez Nafarroak duen errepide-sarea hain da eskasa non Frantziarekin lotzeko ibilbide berria egin beharko litzatekeen. Frantziako errepideen egoera arras desberdina da; errepideak desdoblatzeko eta saihesbideak egiteko aukera ugari daude.
Errepideen ikerketak egitea soilik, 40 milioi pezetako kostua izan du. Aukerak oraindik ere aztertzen ari dira gobernuko arduradunak. Erabakia ez dute datorren azaroa arte jakinaraziko