Legearen arabera, Interes Kulturaleko Ondasunaren izendapena duten hirietako alde zahar guztiek berauen eraikuntza eta azpiegituren zainketaz eta eraberritzeaz arduratzen den plan berezia izan behar dute.
Horixe da Iruñekoaren kasua. Izan ere, 1968an Alde Zaharra Multzo Historiko Artistikoa izendatu zuten. Hiriaren zentroak dituen arazo ugari direla medio, Birgaikuntzarako Udal Bulegoak plan berezi bat egitea proposatu zuen helburu bikoitzarekin: Euskal Herriko hiruburu historikoaren ondare arkitektonikoak babestu eta horien berreskurapen fisikoa, funtzionala eta soziala gauzatu ahal izatea.
Joan den apirilean Udalak BEPPB (Barne Eraldaketa eta Protekziorako Plan Berezia) deritzona onartu zuen. Halaz guztiz, Udal Plana onartu arte, BEPPBa ez dute abian jarriko. Dokumentu sinatu berriak aurreikusten dituen lanak bi lau-urtekoetan burutuko lirateke.
Aurreikuspenak betetzen baldin badira, lehendabiziko lau-urtekoaren bukaeran eraikita egongo lirateke auzoko gizarte-etxea Kondestable Jauregian, Descalzos plaza berria, Navarreria inguruko zolua eta azpiegiturak eraberrituta egongo lirateke. Horrezaz gain, instituzioek kontuan izan dute Alde Zaharrean herritar edadetu asko bizi dela (hiri askotan gertatu den fenomeno hau Iruñean ere jazo da), eta hori dela eta zaharrentzako pisu babestuak egotea aurreikusten du etorkizunari begira.
Bestalde, Labrit pasealekua, Santa María Plaza eta Fermin Aldaparen inguruek aurpegi berria eskainiko lukete, eta horien azpian aparkalekuak egongo lirateke, gaur alor horretan oraindik nabariak diren gabeziak konpontzeko.

Bigarren lau-urtekoa bukatutakoan, BEPPBaren arabera Alde Zaharrak kiroldegia, Santo Domingon, eta behatoki-plaza bat izango ditu. Era berean, Navarreria-Carmen-Redin aldeetako inguruak urbanizatuta eta berreskuratuta egongo dira hiritarren erabilerarako. Baliteke, Redin pasealekuan Hiriko Museoa eraikitzea, bere baitan, ekintza sozio-kulturak hartuko lituzkeenak.
Zortzi urte horietan Sarasate Pasealekuan lur-azpiko aparkalekuak egingo lirateke dagokion zonaldeko urbanizazioarekin batera. Aipatu lan hauei eraikin eta etxebizitzen eraberritze lanak gehitu behar zaizkie.
Alde Zaharrerako plan bereziak aurreikusten dituen ekintza guztiak burutu ahal izateko beharrezkoa litzateke 16.000 milioi pezetako (640 milioi libera) inbertsioa. Kopuru horretatik Udalak 10.000 milioi pezeta, hots, % 62 jarriko luke.
16.000 milioi horietatik 5.000 inguru birgaikuntza lanetara eta etxebizitzetara zuzenduko lituzkete. Gainontzekoa, 11.000 milioi pezeta, azpiegitura lan, gune publiko eta ekipamenduei dagozkie. Zehazki, zortzi urteetan burutuko diren lanetara Udalak 5.379 milioi pezeta (215 milioi libera) zuzenduko ditu.
Kopuru horretatik 2.300 milioi pezeta azpiegitura eta berrurbanizatze lanak egiteko erabiliko dituzte, 1.100 berriz, ekipamenduak egiteko, 145 gune libreak eraberritzeko lanetara zuzenduko dituzte eta 2.000 inguru beharko dira etxebizitzak eraberritzeko.

BEPPBaren helburu garrantzitsuenetariko bat Alde Zaharrean ahalik eta lur-azpiko aparkaleku gehien egitea da, ahal den neurrian. Plan bereziak guztira 5.000 plaza aurreikusten ditu, %60 bertoko bizilagunentzat eta gainontzekoa rotazioarako. Halaber, trafikoa gutxitzeko eta oinezkoentzako ibiltokiak ugaltzeko asmoa adierazita dago plangintzan. Helburu horri jarraiki, Alde Zaharreko kalean pixkanaka oinezkoen erabilerarako jarriko dituzte eta txirringa gero eta gehiago erabiltzeko neurriak bultzatuko dituzte