Eskaintza andana egongo da sinesdunentzat. Baita erlijioa baino tradizioa gustokoa dutenentzat ere. Alde horretatik bederen, ETBkoak ez dira orijinalegiak izan programazioa osatzerakoan. Erlijio kutsua nagusi izan arren, ezin uka ikusmin handia sortzen duten ekitaldiak emango direla: hilaren 28an Bilboko kaleetan zehar egiten den Astotxoaren prozesioa; apirilaren 1ean Segurakoa ETB1ean. Hurrengo egunean, Segura eta Balmasedako Pasioak kate berean. Apirilaren 3an aldiz, «Euskal aktoreen VI. gala» Donostiako Victoria Eugenia antzokitik. Azkenik, igandean, Aita Santuaren urbi et orbi bedeinkapena Romatik zuzenean.
Giro mistiko honen erdian ordea (aktoreena barne), bi saio nabarmendu nahi ditugu, tratatzeko moduagatik ezberdinak izan daitezkeelako, hala «Kontaidazu» nola «Nafarroa, pasio lurraldea» saioek badute tiradizoa. Halaber, Koldo San Sebastianen «Santiago bidea baskonian» erreportajeak (ikus ARGIAko 1.706. alea) biziki interesgarria dirudi.

Gaur egungo umeei dagoeneko entzuten ez zaien esaldia, alegia. Horrela hasi liteke kondaira hau: bazen behin garai bat non telebistak jendearen irudimena lausotu egiten zuen. Haurrek ez zekiten jada ipuinak kontatzen, «kutxa ergelak» dena egina ematen baitzien ahozko tradizioaren kalterako. Ondorioz, ipuinak kontatzeko ohitura kinka larrian zen Europan osoan barrena. Orduan, ETB horretaz konturatu eta ipuingintza galbidetik berreskuratu nahian, «Kontaidazu» saio miresgarria atondu zuen. Zorionez, ahalegin hark ipuingintzaren berpiztea ekarri zuen eta hala ez bazan sar dadila kalabazan. Horrela amai liteke ipuina. Kontuak kontu, irrika hori utzi eta orainaldira bueltatuz, esan dezagun «Kontaidazu» ostegun santuan emango dela, 22:30etan hasita. Bertan, Euskal Herriko zenbait ahots eta aurpegi ezagunek ipuin bana kontatuko dute soinu eta efektuz galanki horniturik. Ipuinak anitzak dira eta jatorriak ere denetarikoak, kontalari bakoitzak bere nortasuna eta estiloa erantsi baitie ipuinoi. Esate baterako, Maddalen Iriartek etxean jasotako ipuina kontatuko digu eta Xabier Mendigurenek bere etxean gertaturiko pasadizoa. Olatz Zugasti musikari eta kantariak Errusiako kontakizun batez liluratuko gaitu. Euskadi Gazteko Joseina Etxeberriak berriz, Ataungo San Martin txikiren ipuina emanen digu ezagutzera.

Berezko nortasuna du Aste Santuak Nafarroan. Modu xelebre batez bizi dute aro hori. Hortaz, berezitasun hori erakustea du xede bazko egunean ETB2an emanen duten «Nafarroa, pasio lurraldea» dokudramak. «La noche de» saioko talde berberak egina da, aurretik ere «En el cruce» hiriei buruzko erreportaje zainduak egin zituena. Halaxe, Iñaki Panguak zuzenduriko ekoizpen honetan, Nafarroan Aste Santuan egiten diren erlijio agerraldien errepasoa egingo da, errealitatea eta antzezpena egokiro nahasiz efektu dramatikoa lortzearren. Erreportajeak bi zati izango ditu. Alde batetik, jendearen jarrera nahiz elizkizunen gibelaldea agerian geratuko dira. Batzuek sinesmen handia erakusten dute, besteen ustez berriz, tradizio hutsa baino ez da. Bestetik, antzinako ohitura hauen jatorria ezagutaraziko da. Betiko topikoetatik aldenduz, honako ospakizunen zatiak izango ditugu ikusgai: Tuterako «Volatin» agerraldia, non Judas irudikatzeko Pinotxoren antzeko panpin bat airera botatzen duten, harik eta arroparik gabe geratzen den arte. Luzaideko «Bolant eguna», ihauterien luzapen gisakoa dena, edo Nafarroako Pasio bizi bakarra, gehi Korella, Lizarra, Iruñea edo Andosillakoak. Aurten grabaturiko ekitaldiak izango dira, gainera. Hain zuzen ere, emisio egunaren bezperan bertan, berpizkunde egunean, bukatuko dute grabaketa. Ziur egon nafar anitz ere zur eta lur utziko dituen erreportajea dela