IRANGAN astean, Josu Jon Imaz Eusko Jaurlaritzako bozeramale berriak Gobernu Kontseiluak izendatutako kargu berrien berri jakinarazi zuen. Zentzu honetan eta Kultura Sailari dagokionez bada berrikuntza aipagarririk. Esanguratsuena Imanol Agote Alberroren izendapena izan da. Pasaitarrak sail horretako aholkulari lanetan jardun du aurreko legegintzaldian eta hemendik aurrera Kultura, Gazteria eta Kirol sailburuorde lanak beteko ditu, kargu horretan Jose Inazio Agirre ordezkatuz. Hizkuntz Politikarako Sailordetzari dagokionez, aldiz, ez da aldaketa nabarmenik izan, hots, Josune Ariztondok bere sailburuorde karguan jarraituko du beste lau urtez.
DONOSTIAKO IRAGANA KAIANDONOSTIAKO kaia eta Parte Zaharra bereizten dituen hesi inguruan XV. mendekoak izan daitezken aztarna arkeologikoak aurkitu berri dituzte: eraikuntza hondakinak, zeramika arrastoak, hezurrak, egur errea...Aurkikuntzok, kaiaren inguruko zulaketa lanen ondorioz egin dira eta hiriaren bilakaera aztertzeko lagungarri izan daitezke, Aranzadi Zientzi Elkarteko arkeologoen esanetan, hiriaren lehen zabalgunea inguru horretan kokatzen baita.
EUSKAL ZINEMA LURRALDEKAJON Letamendiak eta Jean-Claude Seguinek «Los orígenes del cine en Gipuzkoa y sus pioneros» izeneko liburua kaleratu dute Euskadiko Filmategiaren eskutik eta Kutxa Fundazioaren laguntzaz. Modu honetan, Euskal Herriko zinemaren historia osatzen ari da egile bikotea, baina soilik 1895etik 1898ra bitarteko tarteari erreparatuz. Lehenik Arabako zinemaren iragana izan zuten hizpide, ondoren Bizkaikoa eta, Gipuzkoakoa argitaratu berri dutenean, Iparraldeko zinemaren ingurukoa lantzen hasiak dira. Eta Nafarroa? Ezaugarri beretsuko liburu bat ba omen da lehendik Nafarroaren inguruan eta egileek zalantzak dituzte hura egiteak merezi duen ala ez.
HAUR NAFARRAK KANTUANGARESEN emango zaio hasiera martxoaren 7an Nafarroako Haur Kantari Txapelketari. Euskal Kantuzaleen Elkarteak antolatzen duen txapelketak euskal kantagintza zabaltzea eta haurren kanturako zaletasuna piztea du helburu. Finala Iruñean burutuko da, martxoaren 28an.
«BAKARRIK BAHAGO NEGUAN»IZENBURU hauxe du iaz argitaratu zen Jose Luis Otamendiren poesia bildumak. Eta hauxe da iragan astean lehen aldiz eskaini zen ikuskizunari ipini dioten izena. «Dana lanbrotute ikustot» arrakastatsuaren bideari jarraiki Gaztelupeko Hotsak zigiluak poesia eta musika uztartu ditu emanaldi sorta berrian. Ikuskizunaren oinarria aipaturiko izen bereko liburua da. Otamendiren errezitaldiak, idazlearen beraren hitzen gainean egindako kantuekin tartekatuko dira. Musika Labrit Zabalaren eta Imanol Ubedaren esku dago. Bigarrenak badaki zer den Otamendiren hitzak moldatzea, Bide Ertzean taldeko partaide izaki; «Dana lanbrotute ikustot»en ere parte hartu zuen; lehenak, usurbildar kantari gazteak Bide Ertzean-en diskoan parte hartu zuen. Ostegun honetan, otsailak 4, Soraluzen eskainiko da emanaldia eta hilaren 24an, aldiz, Tolosan.