«Gu hasi gabe, nahiko jendek hitz egiten du gizarte edo politikaz»

1996ko apirilaren 21an

Sorotan Bele taldeari elkarrizketa
«Gu hasi gabe, nahiko jendek hitz egiten du gizarte edo politikaz»
«Jonen kezkak» Sorotan Beleren hirugarren diskoa kalean izango da maiatzean
Ustekabean heldu zitzaien ospea eta kantu berriak egiteko betarik gabe gelditu. Ekaitza baretuta, maiatzean aterako dute hirugarren lana. Folk doinuak ahaztu eta pop-arekin datoz «Jonen kezkak».
Bai bitxia hirugarren diskoaren izenburua!
Kosta zitzaigun erabakitzea. «Zorabioa» izan genuen lehenbizi buruan baina ez genuen gehiegi atsegin. Taldeko batzuek hau ere ez dute batere gustuko baina bozketaz irabazi zuen «Jonen kezkak».
Estilo aldaketarekin zatozte, folk gutxiago eta rock gehiago...
Pop amerikarra otsegiten diogu oraingo honi. Txilibito gutxiago entzungo dira eta gitarra gehiago. «Sorotan Bele» eta «Mundu Hegian» diskoetan folk erritmoek indar handia zuten, Irlandakoek bereziki. Hirugarren honetan, aldiz, oinarri erritmikoa pop-rock da, nahiz eta biolinaren eta txirulen usaina antzematen den.
Taldearen haserako boomak eta geroko barealdiak behartu al zaituzte bide hori hartzera?
Taldearen berezko garapena izan da. Musika entzuten goazen einean, kutsuak aldatzen doaz eta taldean hainbeste garenez erreferentzi ugari ditugu. Bigarren diskoan hasi zen aldaketa nabaritzen. Hartan baziren lehenengo diskoaren antza zuten abesti zenbait eta baita pop-rockera asko gerturatzen zirenak ere.
Akaso gertatu dena ez da geldialdia izan dugula; arraroa lehenengo boom hura da. Geronek ere ez dakigu ongi zerk eraman ginduen arrakasta hura izatera. Musikan hutsune hori nabarituta hasi ote ginen galdetzen ziguten baina ez zen aurrez pentsatutako zerbait izan.
Arrakasta hura lortu ezean, gehiago saiatuko al zinateketen?
Oso bapatekoa izan zen guztia. Hainbeste kontzertuetarako deitu ziguten, ezen ez baikenuen kantu gehiago sortzeko astirik eta entsaiatzeko gogorik ere ez. Lan berriak egiteko lasaitasun bila genbiltzan eta horregatik itxaron dugu.
Nor arduratu da azken disko honetako kantuen konposaketaz?
Talde lana izan da batipat eta. Aurrekoengandik beraz lan modua aldatu egin da eta gehiago entsaiatu dugu. Azken bi edo hiru hilabeteotan Michel Ducauren laguntza izan dugu konponketak egiterakoan, instrumentuak euren artean zikindu ez daitezen. Honetan ahalegin berezia jarri dugu kantuak ongi amaituta egon daitezen eta lan polita egin du Michel Ducauk. Hitzei dagokionez, orain arte bezala Gorka Sarriegi eta Mikel Errazkinek idatziak dira gehienak; hamabi kantuetarik zazpi Gorkak eta hiru Mikelek. Bada Ritxi Salaberriak (baxuak) eginikorik ere eta bestea instrumentala.
Zeintzuk dira «Joneren kezkak»?
Kezka pertsonalak, orohar jende aurrean azaltzen ez dituzunak. Maiz zeure barrutik askatu nahi dituzun gaiak dabilzkizu buruan baina ez zara ausartzen argi adierazten. Orduan kantua erabiltzen duzu metaforen bidez barne kezka edo erreflexio horiek kanpora ateratzeko. Behin kanpoan, pertsona bakoitzak ezberdin ulertuko du esaten duzuna.
Sorotan Belek inoiz ez du ezaugarri izan gizarteari eragiten dioten gaietaz mintzatzea. Zergatik?.
Bestela ere nahiko jendek hitz egiten du gai horietaz. Badugu geure iritzia baina ez daukagu zertan azaldu. Geure jarrera argitan uzten dugu zenbaiten alde kontzertuak eskainiz. Halere, zazpiok ez dugu berdin pentsatzen eta errespetatu egin behar dugu elkar.
Musika musika da eta gizartea edo politika beste zerbait. Musika egiten dugu atsegin dugulako eta hitzak gure kezkak adierazteko. Nahiz eta gizarteko arazoek guri eragin agian badituzu barnerago sentitzen dituzun arazoak edo nahiago duzu horiei abestu.
«Hirusta» zigilua erabiliko duzue diskoa kaleratzeko baina izatez autoprodukzioa da. Nolakoa izan duzue esperientzia?
Lan ikaragarria eman digu. Hasieran eskaintza ona egiten zuen estudioa aurkitu. «Elkar»en, esaterako, ordu batzu dituzu eta alde horretatik lasaiago aritu gara. Grabazioen ostean, editatzeko enpresa bilatu behar izan genuen eta behin produktua eskutan, banatzaileak aurkitu eta promozioa bideratu. Halere, askoz ere zapore gozoagoa uzten du geronek egindako lana kalean ikustea. Gainera, disketxe baten menpe izanik ezinezkoa da dirua irabaztea. Horregatik, gero eta gehiago dira autoprodukzioa hautatzen duten musikoak.
Zuzeneko emanaldietaz bizi da Sorotan Bele. Ondo bizi al zarete?
Ez. Zuzeneko emanaldien egoera nahiko larria da. Inork ez du kontzerturik antolatu nahi, jendeak ere ez baitu sarrera ordaindu nahi. Eta hori ez zaio Sorotan Beleri gertatzen soilik; maila guztietan eta musika estilo gehienetan gertatzen da. Hobexeagoa da, agian, erromerietan jotzen dutenen zortea, aurrekontu txikiagoa dutenena.
Aukera, beraz, berbena talde bihurtzea...
Jende asko dago musika talde bateko partaide izan arren, berbena taldeetan aritzen dena. Gainontzean kontzertuetaz soilik ez dago bizitzerik. Guk, ordea, ez dugu aukera horretaz pentsatu. Taldean era guztietako jendea dago, musikaz bizi nahi dutenak eta gustoz soilik dabiltzanak baina kalitateari beti eman diogu garrantzi handia.
MAITE ARTOLA
42-43,44

GaiezKulturaMusikaMusika modeTaldeakSOROTAN BEL
GaiezKulturaMusikaArgitalpenaDiskoak
GaiezKulturaArgitalgintArgitalpenaDiskoak
EgileezARTOLA6Kultura

Irakurrienak

Matomo erabiliz

"Badira hartzea merezi duten arriskuak, genozidioa gelditu behar dugu"

Zigor Olabarria Oleaga

"40 landare mota ditugu oihan baratzean, urte osoan bertatik jateko eta tresna xinpleekin lantzeko"

Estitxu Eizagirre

Bizkaia: EAJren gotorlekua kolokan?

Jon Azkune Torres

Gipuzkoa: Biren arteko jokoa

Iker Iraola Arretxe

Ez da zapalkuntza? Orduan, asimilazioa

Ane Ablanedo Larrion

Azkenak

2024-04-22 | Garbiñe Larrea Iturralde

Intsusaren bigarrena

Joan urteko udaberrian idatzi nuen intsusari eskainitako aurreneko artikulua eta orduan iragarri nuen bezala, testu sorta baten aurrenekoa izan zen. Sendabelar honen emana eta jakintza agortzen ez den iturriaren parekoa dela nioen eta uste dut udaberriro artikulu bat idazteko... [+]

2024-04-22 | Eneko Bachiller Otamendi

Arrain-zoparako, besterik ezean, itsasoko igela

Amonak sarritan aipatu zidan badela arrain bat, garai batean kostaldeko herrietako sukalde askotan ohikoa zena. Arrain-zopa egiteko bereziki ezaguna omen zen, oso zaporetsua baita labean erreta jateko ere. Beti platerean oroitzen dut, eta beraz, orain gutxira arte oharkabeko... [+]

2024-04-22 | Jakoba Errekondo

Lurra elikatu, guk jan

Lurrari begira jartzea zaila da. Kosta egiten da. Landareekin lan egiten duenak maiz haiek bakarrik ikusten ditu. Etekina, uzta, ekoizpena, mozkina, errebenioa, emana, azken zurienean “porru-hazia” bezalako hitzak dira nagusi lur-langileen hizkuntzan.

2024-04-22 | Garazi Zabaleta

Txaramela

Pasta ekologikoa, ortuko barazki eta espezieekin egina

Duela hamabi urte pasatxo ezagutu zuten elkar Izaskun Urbaneta Ocejok eta Ainara Baguer Gonzalezek, ingurumen hezkuntzako programa batean lanean ari zirela. Garaian, lurretik hurbilago egoteko gogoa zuten biek, teoriatik praktikara pasa eta proiektu bat martxan jartzekoa... [+]

2024-04-21 | Gorka Peñagarikano Goikoetxea

'Cristóbal Balenciaga' telesaila

"Nabaritu dadila euskaldun batzuok euskaldun baten istorioa kontatu dugula"

Cristóbal Balenciaga diseinatzailearen biografia kutsuko fikziozko telesaila egin du Moriarti hirukoteak, Disney+ plataformarentzat. Estreinakoa dute formatu horretan. Aitor Arregi eta Jon Garañorekin egin du hitzordua ARGIAk, Jose Mari Goenaga kanpoan baitzen,... [+]

Eguneraketa berriak daude