"Legebiltzarrean denak zurrunduta baleude bezala egon ohi dira"

1995eko urriaren 22an

Nekane Alzelai, EAko legebiltzarkideari elkarrizketa
"Legebiltzarrean denak zurrunduta baleude bezala egon ohi dira"
Nekane Alzelai, Eusko Alkartasunako legebiltzarkidea
Legazpiarra, Telleriarte auzokoa, aspalditik Donostian bizi den arren. 28 urte. Enpresa ikasketetan lizentziatua Sarrikon. EAko legebiltzarkidea Gipuzkoatik pasa den urtetik. Nekane Alzelaik ilusioa, bederen, sobera du berarentzat oraindik oso berria den politikaren mundu korapilatsuan.
Hain gaztea izanik, nola sentitzen zara Eusko Legebiltzarrean politikari profesional adinduen artean?
Gizarteak politikariei buruz duen irudia betikoa da: jende heldua, korbataduna... Esteriotipo hori dago. Politika, ordea, edonork egin dezake, eta ez da soilik pertsona helduen eginkizuna, baizik eta gazteena, emakumeena..., guztiona.
Hasieran beldur piska bat ematen dizu, beraiek urte asko baitaramatzate. Baina interesa izanez gero, sartu eta aurrera. Gaztea izan eta beraiek asko jakinda ere ez dago zertan kokildu.
Zer ekar dezake Nekane Alzelaik Legebiltzarrera?
Legebiltzarrak gazteon freskotasuna behar du, gazteon ikuspuntua. Oso serioa da, serioegia, protokolarioa; denak zurrunduta baleude bezala egon ohi dira. Gauzak askozaz naturalagoak dira eta beste modu batera hitz egiterik badago. Hainbesteko formalismorik gabe gauzak atera daitezke aurrera, agian, errazago. Legebiltzarrari gizartearen naturaltasuna eta freskotasuna eman behar zaio.
Politikariak ospe onegirik gabe ageri dira azkenaldion. Hala izanik, zergatik sartu zara politikan?
Politikari batzuek soilik desprestijiatu dute euren burua, eta azken batean, zikinduta daudenak gutxi batzuk dira. Gauzak ez konpontzeak ere badu eraginik irudi txar horretan. Hori politikarien agilitate faltaren ondorio da. Almidoi guztiak ahaztu eta politika dinamikoagoa egin behar da. Legebiltzarrean nagoenetik guztia oso mantso doan irudipena daukat eta gauzak askoz azkarrago joan daitezkeela.
EAn zein ikusten duzu helburu nagusitzat?
Bakoitzak gizarte ideala du buruan, eta horixe lortu nahi du. Alderdi ezberdin asko dago, eta azken hauteskundeetan azaldu da Euskal Herria oso anitza dela. EAn ikusi dut nigandik gertuen dagoen alderdia, eta hori da gizarte honi nire eskuhartze txikia emateko bidea.
Eta zer eman diezaioke, zure gizarte ideal horren arabera, EAk Euskal Herriari?
Hasteko, eta garrantzitsuena, gizartea bake-bidean jarri. Denok osatzen dugu gizartea eta guztiok parte hartu behar dugu bake-bideratzean, nahiz eta gehiegi kostatzen ari den. Denon elkartasuna lortu behar da. Hori lortzeko epea? Ez dago esaterik; oso urrun ikusten dut.
Autonomi Estatutua egin zenean oso gaztea zinen. Nola ikusten duzu horren etorkizuna?
Aurrerapausoak ematen ari dira. Eusko Jaurlaritzak jada lehentasunak jarri ditu, eta horri buruz urriaren 20an Legebiltzarrean jardungo dugu. Oraindik urrun ikusten dudan gaia da Estatutuaren erabateko garapena. Baina okerrena zera da: hitz egiteko esertzea zenbat kostatzen den.
Nola moldatzen zara EGIko eta Jarraiko gazteekin?
Oro har ondo. EGIko zein Jarraiko lagunak baditut. Ideia politikoak eta ezberdintasunak hor dira, baina pertsona bakoitzaren izaera da kontuan hartu beharrekoa, eta batak ez du bestea kentzen.
Asko hitz egin da azkenaldian kaleko istiluez eta gazteek berorietan izan duten partehartzeaz. Zer gertatzen da?
Istilu horiek aipatzen direnean gazteei buruz hitz egiten da, baina gazte zehatz batzuk dira indarkeria bultzatzen dutenak. Jarraikoek edo istiluak eragiten dituztenek diote euskal gazteria elkartu dela eta abar, eta gazte batzuk baino ez dira. Istiluak eragitera zerk bultzatu dituen? Etsipenak eta manipulazioak eragin handia dute.
Mundu guztia orain HBrekin hizketan hasteko ados dagoela dirudi. Zer eman dezakete elkarrizketa horiek?
Lehen urratsa, eta ezinbestekoa, hizketan hastea da. Hitz egiten jarriz gero, bakoitzak zer nahi duen jakin daiteke. Ez bagara sekula eseri eta hizketan hasten, uste soiletan ibiliko gara eta horrela ez gara inora iritsiko. Eseri eta gardentasunez jokatu behar da, bakoitzak zer pentsatzen eta zer nahi duen adierazi, eta modu horretan elkar ezagutuko dugu. Hori abiapuntutzat hartuta eta bakoitzaren nahiak zein diren jakinda, nolabaiteko negoziaketetan hasi eta irtenbidea bilatzen hasteko moduan izango gara.
Gutxieneko borondatea ageri da orain bi aldeetatik, baina borondate hori praktikan jarri behar da. Benetan borondatea badago, hizketan hasi behar da, inolako aurre-baldintzarik gabe.
Zertaz hitz egin daiteke?
Lehenengoz, argi utzi behar da bakoitzak zer nahi duen. Ondoren, nahi horiek batu egin behar dira eta irtenbidea bilatu. Zertaz hitz egin? Lehenik, bake-bideaz. Behin bakea nola bideratu jakitean gainontzeko guztia jarraian etorriko da.
Presoen senitartekoak ezagutuko dituzu. Zer egin dezake parlamentari batek horien egoera hobetu edo konpontzeko?
Euskal presoak Euskal Herriratzearen aldekoa naiz, eta bergizarteratzearen aldekoa. Pertsona batek gizartearentzat kaltegarria den zerbait egiten badu, kaltearen ordainetan gartzela-zigorra jartzen diote. Gertatzen dena da pertsona hori gartzelan dagoen artean aldatu eta garatu egin daitekeela. Gizartearentzat kaltegarri ez den norbait bihurtzen bada, zergatik ez bergizarteratu?
Zein itxura eman zizun Jose Antonio Ardanzak kurtso politikoari hasiera eman zion Legebiltzarreko plenoan?
Gauza batekin geratu nintzen: behin eta berriz «nire gobernua» esaten zuen. Gobernua ez da berea, denona baino. Egia esan, niri askozaz gehiago gustatu zitzaidan Joseba Egibar.
PSE-EEkoekin eroso sentitzen zaren galdetuko zizuten jada herrian...
Abertzale gisa, gobernuan egoteko aukerari ezin genion ihes egiten utzi. Gobernu abertzalea nahi dugun neurrian, bertan parte hartu behar dugu. PSE-EE eta PPri elkartu eta gobernuan sartzen utzi behar al zaie, ala? Abertzaleok elkartu egin behar dugu eta irtenbideak bilatu eguneroko arazoei. Gobernua osatzeko, baina, ez genuen gehiengoa osatu, hirugarren bat behar zen, eta sozialistak sartu ziren. Programa hiruron artean osatu eta onartzen bada, zergatik ez? Gainera, oro har, gaur egun gobernu abertzalea osatzen dugu.
Azken hauteskundeen aurrean, Gipuzkoan izan zen EUE, EA eta EAJkoen artean konbergentzia burutzeko ahalegina. Nola ikusten duzu jelkideekin bat egitea?
Elkartu eta alderdi bakarra osatzea oso zaila da, eta ez dut uste komenigarria denik gainera. Gauza bat da abertzale izatea, baina abertzaleen artean badago eskuina, badago ezkerra eta badago zentroa, eta guztiek eduki behar dituzte euren aukerak. Horregatik sortzen dira arazoak, eta horregatik zatitu zen EAJ eta EA sortu. Koalizioa osatzea? Agian posible da, ez dut ezeztatzen. Baina gero bakoitzak bere nortasuna mantendu behar du.
Hirukoaren formulak EAren etorkizunari lagunduko dio ala EAJren aldamenean zuen irudia ahultzen eta suntsitzen joango da?
Argi dago EA non dagoen eta non EAJ. Ez zait iruditzen gu ahuldu eta beraiek indartuko direnik. Ezberdintasunak hor dira eta horiek eguneroko adierazpenetan islatzen dira. Gobernuan elkarrekin egon arren, nork bere nortasuna mantentzen du.
EAE eta Nafarroako gobernuetako kide da EA. Bion arteko erlazioa indartzeko zer egingo du?
Horretan ari gara. Urriaren 29an EAk Alkartasun Eguna egingo du, aurten Nafarroan. Horrekin gure ustea azaldu nahi dugu: EAE, Nafarroa eta Iparraldea bat garela. Datorren abenduan gure laugarren batzarra burutuko dugu. Hor bada ponentzia bat «Politika instituzionala» deritzona, eta beronetan aipatzen da Nafarroa eta EAEko gobernuen arteko elkarlana eta harremana sendotzeko formularen bat bermatu behar dela.
Itoizko urtegiaren kasuan Nafarroako gobernua ondo jokatzen ari dela iruditzen al zaizu?
Epaia hor dago eta Nafarroako Gobernuak bete egin beharko luke. Bat nator epaiarekin. Nafarroako Gobernuak errekurritu egin du, baina epaia hor dago.
JAUREGI, Mikel
8-10,11

GaiezPolitikaEuskal HerrTaldeakAlderdiakEA
GaiezPolitikaEuskal HerrErakundeakLegebiltzar
PertsonaiazALZELAI1
EgileezJAUREGI5Politika
EgileezUBIRIA2Politika

Irakurrienak

Matomo erabiliz

Zapaterok dio Ostiral Santukoaren gisako akordio bat egon zela ETAren amaieran

Xabier Letona Biteri

Lurra taupaka hasiko da

Estitxu Eizagirre

"Nire burua duela 20 urte bezain indartsu ikusten dut"

Euskalerria irratia | Miren Mindegia

Kanpaldien lehen garaipenak iristen hasi dira Israelekiko boikot akordioekin

Jon Hidalgo Gereñu

Efemeridea: Espainiarenak ziren lurraldeetan, "gaztelania ez beste hizkuntza guztiak desagerrarazteko" agindu zuen Carlos III.a Borboikoak

ARGIA

“Maite dut Iparraldean antzerkia egitea, uste baitut hemen kodeak ulertzen direla”

Gorka Peñagarikano Goikoetxea

Azkenak

2024-05-12 | Urko Apaolaza Avila

Koopfabrika

Kooperatiba eraldatzaileen harrobia

Olatukoopek beste hainbat eragilerekin batera garatu duen proiektu nagusienetako bat KoopFabrika da, ekintzailetza soziala bultzatzeko helburuz 2017an sorturiko programa, eta gaur egun oraindik martxan dagoena.

Hasiera batean, lehenengo ideia izan zen ekonomia... [+]

2024-05-12 | Nerea Menor

Ghayath Almadhoun

"Alemania nagusitasun zuriaren piramidearen gailurrean dago, eta lehen holokaustoa ukatu zutenek orain Nakba ukatzen dute"

Ghayath Almadhoun-ekin hitz egin dugu Alemaniako zentsura sistemikoaz eta horren ondorioez. Siriako Damaskon 1979an jaiotako poeta palestinarra, Suediara joan zen bizitzera eta egun Berlinen bizi da. Bere poesiak, ia 30 hizkuntzatan itzulia, maitasuna, tokialdatzea eta nortasuna... [+]

2024-05-12 | Estitxu Eizagirre

Amillubiren festa maiatzaren 11n

Lurra taupaka hasiko da

Urola ibaiaren meandroan, Zestoako Iraeta auzoan daude Amilibia baserria eta bere lur emankorrak: 5 hektarea baso eta 4 hektarea laborantza lur. Laborantza ekologikoa sustatzen duen Biolur elkarteak baserria eta lurra kolektibizatu nahi ditu Amillubi proiektuaren bidez... [+]

2024-05-12 | Amets Aranguren Arrieta

Pastoral bat Iruñearendako

Herri-antzerki forma bat da pastorala. Sujet edo protagonista bat (hildakoa) hautatu eta bere bizia bertsotan ematen duena. Kantua ere presente dago emanaldian. Taula zuzendaria, taula gainean arituko diren arizaleak eta musikariak aritzen dira pastorala ematen den egunean... [+]

2024-05-12 | Urko Apaolaza Avila

'Ekonomia eraldatzailea(k)' liburua

Ekonomiaren adjektibo guztiak

10. urteurrena kari, Olatukoopek bi liburuxka atondu ditu eta labean ditu jadanik, ekonomia eraldatzailearen eta kooperatibagintzaren ingurukoak biak ala biak. Alde batetik, herri-kooperatiben inguruko eskuorri edo gida bat kaleratuko dute, herri kooperatiba bat zer den... [+]

Eguneraketa berriak daude