Harremanen Mundu Txiki Hori Distantzia Motzetik Begiratuta


1995eko ekainaren 25an
Arantxa Iturberen azken liburua
Harremanen Mundu Txiki Hori Distantzia Motzetik Begiratuta
Arantxa Iturbek "Lehenago Zen Berandu" Liburua Plazaratu Du Alber- daniarekin.
Bere bigarren liburua plazaratu du Arantxa Iturbek. Aurrekoaren antzera narrazio laburrak idatzi ditu, hamahiru guztira, bizi-biziak, hizkera zuzenekoak, begietatik ere sartzen direnak, harremanen inguruan. Bizitzan askotan konturatu gabe pasatzen diren kontuak interesatzen zaizkio idazleari.
UTZIKO al digu Arantxa Iturbek pasarte baten bidez «Lehenago zen berandu» liburuaren berri ematen:
--Dolores, mesedez. Hitz egin dezagun. Hanka sartu nuen, badakit, oso gazteak ginen eta nik ez nekien zertan ari nintzen. Baina orain...
--Orain joan egin nahi dut.
--Barkaidazu.
--Ez dago zer barkaturik.
--Zure ondoan bizi nahi dut...
--Lehenago zen berandu...
Beranduegi. Harremanen inguruan zorroztu du bere luma idazle alegiarrak, desinkronizatuta (halaxe esatea du gustuko berak) bizi garela adierazteko:
«Askotan, eta ez maitasun kontuetan bakarrik, bi pertsonaren momentuak batera etortzea oso zaila izaten da».
Honen harira dator, hain zuzen ere, titulua.
Egun bizi ditugun korapilo handiak alde batera utzi eta, bizitzan hainbatetan konturatu gabe pasatzen diren gertaerei erreparatzen die liburuan, beti ere distantzia motzetik eta mugimendu guztiak jasoz:
«Jendearen erreakzionatzeko moduak interesatzen zaizkit; modu batzuk oso zinematografikoak dira, liburuan agertzeko politak oso, eta horiek asmatzen primeran pasatzen dut».
Jendeak ohean dauzkan eztabaidak (edo sexuen arteko guduak), kasualitatez gertatzen direnak... «mundu txiki hori» azpimarratu nahi duela dio Arantxa Iturbek.
Harremanen mundu txikian zehar egiten duen bigarren bidaia da, nahiz eta berak dioenez, duela hiru urte kaleratutako «Ezer baino lehen» eta «Lehenago zen berandu» modu ezberdinean prestatu dituen:
«Lehen liburua kasualitatez atera zen, lehiaketa pare batera aurkeztu, suertea izan, irabazi, gero enkarguzko lan batzuk jaso, haiek egin, argitaletxeari gustatu, eta horrela. Oraingoa ezberdina izan da: urte t'erdian ezer idatzi ez eta, animoz bete ondoren ekin nion, nahi nuelako eta nire kabuz, inongo enkargurik gabe».
Astebururo aritu da, ordenagailuaren aurrean eseri, eta berezkoa omen duen gaiztakeria puntu horrekin, istorioak makinatzen. Ez zaizkio gauzak erdizka uztea gustatzen. Odol berokoa izaki, tik-tak batean egin ditu ipuinak, hasi eta bukatu.
Eszenaz betetako liburua
HALAKOXEAK dira testuak, arinak, tik-tak batean irakurtzen direnak:
«Eszenaz betetako liburua da, begietatik ere sartzen dena, elkarrizketa askokoa, gidoi baten itxura hartzen du hainbatetan».
Arina aipatu dugu baina, ez du berak oso gustuko hitz hori, aurreko liburua definitzeko orduan ere askotan erabili zela eta, ematen omen zaion zentzu peioratiboaz kezkatuta baitago:
«Arina dela esaten denean, bizkorra, freskoa... pisua ez den zerbait dela ulertzen dut, baina badirudi, literaturari dagokionez, beste zeozer azpimarratzen dela adjetibo honekin».
Hala ere, harro defenditzen du egin duen aukera, aurrekoan aldarrikatu zuenaren antzera «Lehenago zen berandu» liburua ere hondartzan irakurtzekoa dela esanez:
«Nik oso gustura irakurtzen dut hondartzan, eta asko eskertzen dut hiru folio irakurri, istorio bat hasi eta bukatu, eta ingurura begiratzea. Hori da nik aukeratu dudan estiloa eta zain nago kontra dauden guztiek zer esaten duten».
Behingoz etiketak utzi eta egindakoa baloratu diezaioten nahi du:
«Duela hiru urte, liburua baino neska, gaztea eta berria nintzela azpimarratu zen. Oraingoan, horiek guztiak ahaztu eta hartu dudan bideaz hitz egin dadin nahi dut».
PETRIKORENA, J.J.
42-43

GaiezKulturaLiteraturaIdazleakITURBE7
GaiezKulturaLiteraturaArgitalpenaNarratiba
GaiezKulturaArgitalgintArgitalpenaLiburuakLiteratur l
PertsonaiazITURBE7
EgileezPETRIKOREN1Kultura

Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude