«Nazioek Europan boterea izateko borrokan jarraitu behar dugu»

1994ko maiatzaren 08an

Heribert Barrera (ERC)-ri elkarrizketa Europako Batasanuri buruz
«Nazioek Europan boterea izateko borrokan jarraitu behar dugu»
Heribert Barrera, ERCko eurodiputatua
Europako Legebiltzarreko dipiutaturik zaharrenetakoa da 76 urteko politikari katalana. EA eta ERCk, bi urtez bakoitzak, eserleku bera erabili dute Strasburg zein Brusselan. Legealdi bietan ibili da Legebiltzarreko pasabideetan gora eta behera eta, egia esan, haietatik berari jarraitzea ez da batere samurra. Europako politikagintzaren bere azken egunetan, Europako Batasunari buruz jardun dugu Strasburgeko bere bulegoan.
ARGIA. Nola eragingo dio Europako Batasunari iparraldeko lau estatu berrien sarrerak?
HERIBERT BARRERA. Nire ustez onuragarria da. Demografikoki txikiak dira eta horregatik, akaso, EBren antolakuntza eta ordezkaritzaren eredutik gertuagokoak ditugu. Ekonomikoki behar bada alderantziz da, hegoaldeko herriek indarra galtzen dute eta kaltetuak ateratzen dira, baina oro har positiboa iruditzen zait. Hasiera bateko proiektuaren garapena alegia.
A. Bi abiadurarekin jarraituko dugu ala eragingo al dute horretan ere?
H.B. Zentzu horretan eurak ere ez dira homogenoak. Konbergentzia ekonomikoa zailduko dute baina argi dago: konbergentzia hori etortzekotan denbora luzea iragan beharko da edo bi abiadurena behingoz onartu egin beharko da. Eta bi abiadura badaude, zergatik ez hiru?
A. Hauen sarrerarekin ekialdeko herrien sarrera ixten da?
H.B. Ez dut uste. Polonia, Hungaria, Txekar Errepublika eta Eslovakiaren sarrera ere ezin da gehiegi atzeratu, mende bukaera aldera gauzatu beharko litzateke. Hori Europaren eraikuntzaren ikuspegitik ez da denbora asko.
A. Konbergentzia ekonomikoa aurrera doa baina, seguruenik, konbergentzia sozialaren bizkar, eta badirudi zanga gero eta handiagoa izango dela.
H.B. Oso arazo handia da. Merkatu batasunak egundoko mesedea dakarkie herri garatuenei, eurek egiturazko fondoetan jartzen dutena baino askoz etekin handiagoa ateratzen dute. Beraz, ezin da berba egin Europako Batasunaz Gizarte Segurantza batua guztien artean bakoitzari dagokion neurrian finantzatzen ez bada.
A. Nola jokatu behar dute herrialde txiroenek egoera horren aurrean?
H.B. Ikuspuntu batu bat lortzen saiatu beharko lirateke baina, zoritxarrez, bakoitza bere aldetik doa. Oraindik inork ez dio heldu arazoari sustarretik. Espainia, adibidez, kohesio fondoetatik lortutako `dirutzarekin' gustura geratzen da eta kitto. Baina horrek ez du oinarriko arazoa konpontzen eta horri benetan heldu barik, herri txiroak gero eta txiroago izango dira. Gaur egun, zenbait estatu EBn sartu zirena baino txiroagoak dira.
A. Ekonomikoki zein politikoki batasun prozesua aurrera doa, herritarren eremuan, aldiz, gauzak geldirik daude. Zer gertatzen da?
H.B. Pasaporte eta abarreko paperen kontua konpontzea samurra litzateke komunitateko biztanleetara mugatuko balitz, baina inmigrazioaren arazoak asko zailtzen du batasun hori. Ulertzen dut teorian samurra dena praktikan horrenbeste zailtzea. Beraz, Schengeneko akordioen gauzatzerako denbora asko pasatuko da oraindik.
A. Horregatik, besteak beste, itxikeria eta arrazakeria salaketak ere gero eta gogorragoak dira EBren aurka.
H.B. Europak ezin du mundu osoko miseria bere bizkar hartu, hori ez da normala. Etorkin kopuru bat onar daiteke, baina ez gehiago. Ez dakit zeren izenean defenditu gura den erabateko ate zabaltze hori. Mundua den modukoa da, eta zabalkunde honek aberatsei egiten die mesede; aberatsak beren auzuneetan lasai asko bizi dira eta txiroak bazterretan pilatzen dira, oso ondo doakie zerbitzari filipinoak izatea...
Lurraldearen defentsak, inmigrazioa mugatzera behartzen gaitu. Nire katalan izaerak jarrera hori indartu egiten du gainera. Maila pertsonalean ez dut ezer etorri direnen aurka, baina argi dago Katalunia atseginagoa zela bertan hiru milioi pertsona bizi zirenean sei milioi bizi direnean baino. Anaitasun hori inongo muga barik zabaldu gura izatea ezker faltsu baten printzipioak direla uste dut. Ez naiz mugak erabat zabaltzearen aldekoa.
A. Orduan, komeni denean bai eta bestela ez.
H.B. Komeni, zentzu klasikoa erabiltzeagatik, burgesia eta klase nagusiei komeni zitzaien baina ez populazioari. Kataluniaren kasuan hobe izango zatekeen 60ko emigrazio handia baino adibidez lantegietako makina eta azpiegitura hobetzea. Francori komeni zitzaion.
A. Zer iruditzen zaizu Maastrichteko Itunaren osasun egoera?
H.B. Europako erakundeei buruz, Maastrichteko Ituna errealitate bat da eragile juridiko moduan, baina ez diru bakarra eta konbergentzia ekonomikoaren aldetik, 1996rako guztia berraztertu behar da, epeak, baldintzak... Bestalde, erabateko trukea dogma bihurtu da eta alde horretatik murrizketa sozialak nagusitzen ari dira. Horren aurka egin behar dugu.
Mundu mailan ere teoria horiek nagusitzen ari dira eta GATT eta antzerakoekin Hirugarren Mundua txirotu besterik ez da egiten. Hazkundearen eredu jartzen dituzten Hirugarren Munduko herrialdeetan ere, Txile kasu, murrizketa sozialak gero eta handiagoak dira eta txiro eta aberatsen arteko zanga ere bai. .
A. Europako estatu gabeko herriei dagokionez?
H.B. Maastrichtekin berdin gaude. Zenbait arlotan, Komunitatearen trabak gehitu egin dira eta, beraz, egoera kaskartu. Nazioek Europan boterea izateko borrokan jarraitu behar dugu, ez dugu etsi behar borroka horretan.
A. EBk Erregioen Batzordea jarri du errealitate horri zelanbaiteko erantzuna eman guran baina, aldi berean, ez al da Batzorde bera herriei dagozkien eskubideen ukazioa?
H.B. Batzordeak ahalmen txikia du baina bere izate horri ere aurrerapausoa deritzot. Dena den, nahiz eta aholku mailakoa bakarrik izan, duen garrantzia juridikoki ematen zaiona baino handiagoa da. Europako Batasuna eta estatu klasikoaren artean orain arte ordezkatuta egon ez diren beste osagai batzuen kontzeptua sartzen duen edozer beti da positiboa. Hots, zalantza guztiekin baina azkenean, alderdian Maastrichti ezer baino hobea zela iritzi genion.
A. Zer iruditzen zaizu Erregioen Batzordearen erdia udaletxeetako ordezkariekin osatua egotea.
H.B. Akats handia. Horrekin estatuaren egituretatik aparteko usaina eduki dezakeen edozer ahuldu gura dute. Horrez gain, estatu askotan erregioek ez dute eratze instituzionalik eta horrek garrantzia izan duela uste dut. Denborarekin erregioek eta udaletxeek batzorde bana izango dutelakoan nago. Udalek ere ulertuko dute beraien eta erregioen interesak desberdinak direla.
A. Killilea txostena onartu zen eta katalanari ere estatus ofizial berezi bat eman zitzaion, baina hemen oraindik ez da katalanik entzuten.
H.B. Katalanari buruz zerbait aurreratu da baina, oro har, gutxi aurreratu da hizkuntza gutxiagotuen arloan. Hizkuntzen gainean Ministro Kontseiluak erabakitzen du eta kitto. Dena den, estatu berrien sarrerak hizkuntz sistemen erreforma ekarriko du; lau herrialde hauek sartzen direnean hiru hizkuntza gehiago izango dira. Gaur egun 72 itzultzaile talde daude, hiru berri horiekin 110 izango lirateke. Txekarrak, eslovakiarrak, bulgariarrak eta poloniarrak sartuko balira, adibidez, 210 talde lirateke. Beraz, hizkuntzen arazoa aztertu behar da eta honek hizkuntza gutxiagotuentzat aukera berriren bat zabal dezake.
Xabier Letona
16-18

GaiezPolitikaNazioarteaErakudeakEuropako Ba
PertsonaiazBARRERA1
EgileezLETE1Politika
GaiezPolitikaNazioarteaEstatuak/NaKATALUNIA

Irakurrienak

Matomo erabiliz

Ertzaintzak herritar bati Irunen egindako erasoak haserrea eragin du

Lander Arbelaitz Mitxelena

"Zenbat dugun kontatzeko!" Euskal Herriko mapa sortu dute

Euskal Irratiak

54 urteko espetxe eskaera sei pertsonarentzat presoen ongi etorriak antolatzea egotzita

Xabier Letona Biteri

"Nire burua duela 20 urte bezain indartsu ikusten dut"

Euskalerria irratia | Miren Mindegia

Israel ahulduta eta Iran boterea hartuta

Asier Blas Mendoza

Zapaterok dio Ostiral Santukoaren gisako akordio bat egon zela ETAren amaieran

Xabier Letona Biteri

Azkenak

2024-05-12 | Urko Apaolaza Avila

Koopfabrika

Kooperatiba eraldatzaileen harrobia

Olatukoopek beste hainbat eragilerekin batera garatu duen proiektu nagusienetako bat KoopFabrika da, ekintzailetza soziala bultzatzeko helburuz 2017an sorturiko programa, eta gaur egun oraindik martxan dagoena.

Hasiera batean, lehenengo ideia izan zen ekonomia... [+]

2024-05-12 | Nerea Menor

Ghayath Almadhoun

"Alemania nagusitasun zuriaren piramidearen gailurrean dago, eta lehen holokaustoa ukatu zutenek orain Nakba ukatzen dute"

Ghayath Almadhoun-ekin hitz egin dugu Alemaniako zentsura sistemikoaz eta horren ondorioez. Siriako Damaskon 1979an jaiotako poeta palestinarra, Suediara joan zen bizitzera eta egun Berlinen bizi da. Bere poesiak, ia 30 hizkuntzatan itzulia, maitasuna, tokialdatzea eta nortasuna... [+]

2024-05-12 | Estitxu Eizagirre

Amillubiren festa maiatzaren 11n

Lurra taupaka hasiko da

Urola ibaiaren meandroan, Zestoako Iraeta auzoan daude Amilibia baserria eta bere lur emankorrak: 5 hektarea baso eta 4 hektarea laborantza lur. Laborantza ekologikoa sustatzen duen Biolur elkarteak baserria eta lurra kolektibizatu nahi ditu Amillubi proiektuaren bidez... [+]

2024-05-12 | Amets Aranguren Arrieta

Pastoral bat Iruñearendako

Herri-antzerki forma bat da pastorala. Sujet edo protagonista bat (hildakoa) hautatu eta bere bizia bertsotan ematen duena. Kantua ere presente dago emanaldian. Taula zuzendaria, taula gainean arituko diren arizaleak eta musikariak aritzen dira pastorala ematen den egunean... [+]

2024-05-12 | Urko Apaolaza Avila

'Ekonomia eraldatzailea(k)' liburua

Ekonomiaren adjektibo guztiak

10. urteurrena kari, Olatukoopek bi liburuxka atondu ditu eta labean ditu jadanik, ekonomia eraldatzailearen eta kooperatibagintzaren ingurukoak biak ala biak. Alde batetik, herri-kooperatiben inguruko eskuorri edo gida bat kaleratuko dute, herri kooperatiba bat zer den... [+]

Eguneraketa berriak daude