Kaki Arkarazo: "M-ak taldeak zentzu musikal propioa finkatu du"

1990ko ekainaren 24an

M-ak musika taldeko Kaki Arkarazori elkarrizketa.

ARRAKASTA HANDIA LORTU DU M-AK TALDEAK IAZTIK HONUNTZ
Kaki Arkarazo: "M-ak taldeak zentzu musikal propioa finkatu du"
Os Resentidos taldeak inguru hauetan eskeini duen jiraz baliatu dira M-ak-ekoak "Gor" izeneko disko berria aurkezteko. Gitarren indarra, musikaren gordintasuna, eta letren zorroztasuna dira bosgarren elepe honen bereizgarriak.
ARGIA.–Ze aldaketa eskeintzen du Gor-ek?
KAKI ARKARAZO.–Soma daitezkeen aldaketak akzidentalak izan dira, nahigabekoak. Gu ez gara profesionalak honetan. Batzutan bizibidea eta M-ak konpajinatu ahal izatea zaila da oso. Egoera honetan dagoen partaideak, logikoa den bezala, taldea uzten du. Halako zerbait gertatu zaigu perkusioarekin, eta baita bateriarekin ere. Jende berri batekin jotzeak izan du zalantzarik gabe aldaketan zerikusia. Ondorioak? Gaur egun egiten dugun musika gordinagoa da, xinpleagoa, zuzenagoa. Ez dugu garai bateko nabardurarik, ez instrumentu aldetik, ez bestela.
Bestalte, lehen Xabier eta biok betetzen genuen taldeko sortze-lana. Ideiak baino, ederki mamitutako kantak aurkezten genizkien beste taldekideei. Gero nork bere instrumentura egokitzen zuen erakutsitako hori. Gaur egun ia ia berbera aporta tzen dugu lauok.
A.–Nolaz disko berri honen aurkezpena, promozioa, Os Resentidos taldearekin?
K. A.–Hemen aurkezpenak egitea ez da gozo-gozoa izaten. Sortu duzun lana ezagutarazteko balio duten neurrian beharrezkoak dira. Beste zentzu guztietan, ordea, alperrikakoak. Prentsari eskeintzen zaizkion montaje rutinarioak baizik ez dira, nolabaiteko pintxojana ofizialak. Os Resentidos taldea inguru hauetara zetorrela jakin arazi ziguten halako batean. Diskoa piska bat lehenago aterata, kontzertutan elkarrekin jotzea aitzaki polita iruditu zitzaigun, ohizko aurkezpenetatik ihesian, gure azken produkzioa plazaratzeko.
A.– Zergatik azal hori, grafiko eta titulo hori?
K. A.– Lp-a osatzen duen kantetako bat aukeratzen dugu diskoaren azal modura beti. Gero horri dagokion grafikoa eransten diogu. Zuloa-n, entsaiatzen dugun tunelean ateratako argazkiak erabili genituen esate baterako, eta Barkatu Ama-n etxea txikitzen ari den haurra azaldu genuen. Azken honetan gehien gustatzen zitzaigun kantetako bat "Gor" zen. Beraz, horrek eman dio azala. Grafikoak izenarekin duen lotura begibistakoa da.
A.–M-ak taldearen eboluzioa nabarmena izan da. Aipatu duzu zerikusirik izan duela bateriak. Joera, gogorretik hasita ere, gero eta musika komertzialagoa egitea izan ohi da. Zuena ordea, kontrakoa izan da.
K. A.–Gu komertzialak ez gara sekula izan, baina orain baino biguinagoak bai. Beti ikusi izan dugu geure burua, hala ere, normalean egiten den musika estandarretik urrun. Onerako, txarrerako akaso, ez diogu sekula entzulegoa erakartzeko modua asmatzeari erreparatu. Musika sortzeko dugun moduari baldintzarik ez jartzeak gogorrera eraman gaitu, eta zorrotz izateak publikoarekin harremanak estutzen lagundu digu izugarri. Eboluzioa naturala izan da, ez dago filosofia ezkuturik atzean.
A.–Arrakasta handia lortzen ari zarete...
K. A.– Aipatutako eboluzioak gaitz baino on egin digu. Jendeak leloak, askok baita letrak oso-osorik ere, memoriz dakizki eta kantatu egiten ditu. Azkenengo singela jotzen hasten garenean jendea saltoka jartzen da. Gauza harrigarria guretzat, alde horretatik ez gara kexu. Plazarik plaza jotzeak asko lagundu digu popularizatze horretan.
A.–Nonbait Goierri-Tolosa aldean duzue arrakastarik handiena...
K. A.–Ordizian ez dugu Fans Club-ik baina oso gutxigatik. Urtero jotzen dugu hango festetan gaztetxean. Horrek izango du ziurrenik eragina. Eskein dezakegun guztia emateko prest gaude bertan. Bestela ez dugu inguru haietan kontzertu handirik egin. Tolosan pare bat aldiz jo dugu, Ataunen behin...
Bada, hala ere, Andoaindik hasi eta Ordiziraino gurekin nolabaiteko identifikaziorik senti lezakeen talde nukleo bat: BAP, BUKAERA, KARKAXA... Gazte ugari mugi arazten duen gune honek izan du, zalantzarik gabe, zerikusirik.
A.–Zergatik "ehun ginen"i bertsio berria?
K. A.–Haserako hura beste garai batean egin zen, taldea ez zen berbera. Transizio momentu batean zegoen M-ak. Diska hartan egin genuen musikak sei hilabete baino ez zuen iraun. Jendeak, taldea aldatzen ari zen heinean, haseran grabatutako hori ezbeste entzun izan du zuzeneko kontzertutan. Guk gure aldetik beti izan dugu zuzeneko hori grabatzeko irrikia. Azken singeleko B aldean sartu dugun hori da gure benetako "ehun ginen". Batzuen eritziz Kortatu-rena hobea da. Beste batzuk nahiago dute gure haserako bertsioa. Gu, ordea, pozik gaude egin dugunarekin, kanta gurea da gainera. Jendeak nahi duena esan dezala.
A.– Nola ikusten duzue musika mundua bertan?
K. A.–Taldeen eta musika beraren osasuna oso ondo ikusten dut. Oso multzo polita daukagu Euskadin. Denboraren poderioz taldeak onduko dira, lortuko dute eremu zabalagoa. Dauden organizazioek, enpresek, helburua dirua dutenez, segurura jotzen dute beti, eta horretarako badituzte jendetza erakarriko duten bizpahiru talde. Ez dira talde gazteekin arriskatzen. Beraz, berrien irtenbidea gaztetxeak dira, bestela itxoin beharrean daude. Dena den, aurtengo uda aberatsa izango da oso, giro polita datorkigu. Gaztetxeak oso baliagarriak dira hala ere, zailtzeko, konfidantza hartzeko. Hala eta guztiz ere, kanporako panorama askoz ere okerrago dago, hau zoragarria da kanpokoentzat, galdetu bestela "Os Resentidos"ekoei.
Hemen badaude aurrera ateratzeko posibilitateak, infraestruktura... konfidantza da, behar bada, falta dena. Bestela talde berriak oso ondo prestatuta daude.
A.–Ze musika moten eragina dituzue?
K. A.–Gure taldean nor bere kasa dabil, ez gara koadrilakoak, taldeak biltzen gaitu soilik. Entsaiatzeko biltzen gara justu-justuan. Bakoitzak bere gustoak, bere eraginak ditu. Gero abestietan guztiona biltzen saiatzen gara. Hori osasunaren sinale da, ahaleginak ez bait daude sakabanatuta. Aurreko diskotan estilo diferenteak nahastu ditugu. Abesti bakoitzeko bana ia. Gor-en gure zentzu musikal homogeneo eta propioa kanta guztietan gauzatzea lortu dugu. Elepe honetan agertzen diren abestien lelorik gehienak silaba bakarrekoak dira, "Gor", "to", "bingo", esate baterako. Lelo motz hauek eskatzen duten inpulsoa, indarra, bada adibidez gure estiloaren ezaugarrietako bat.
GARBIÑE UBEDA
Silaba bakarreko leloen indarra eta inpultsoari garrantzi handia eman diote elepe honetan.
Mikel Irazoki, Kaki Arkarazo, Fernando Leitza eta XabierMontoiak arrakasta handia lortu dute azken urte honetan.
46-47

GaiezKulturaMusikaMusika modeTaldeakM-AK
PertsonaiazARKARAZO1
EgileezUBEDA1Kultura

Irakurrienak

Matomo erabiliz

"Gure Herriaren etorkizuna eta hizkuntzarena batera joango dira"

Miel Anjel Elustondo

EAJko karguen senide harrobia

Ahoztar Zelaieta

Ondoezaren epidemiaz

Olaia Salazar Urrutia

Pertsona batzuek GIBa berez nola kontrolatzen duten aurkitu dute

Elhuyar | Egoitz Etxebeste Aduriz

Emakumeen plazera

Barbara Miller

Azkenak

2024-04-29 | Nagore Iturrioz Lopez | Yolanda Porres García | Steilas sindikatua

Hezkuntza publikoari buruz hitz txintik ere ez hauteskundeetan!

2024-04-29 | Rober Gutiérrez

Errenta aitorpena, euskaraz

2024-04-29 | Iñigo Satrustegi

Beste 40 urtez esperoan egon nahi ez baduzue

2024-04-29 | Goiuri Alberdi | Aintzira Oñederra | Asunek

Ei politikariak, “pope” akademikoek esaten badizuete, aktibatuko al zarete behingoz?

Behetik gorako komunikazioetan ez da erraza mezuen garrantzia transmititzea eta makinaria politikoa aktibatzea. Askotan, gure mezuak "belarri batetik sartu eta bestetik atera" egiten direla sentitzen dugu. Beraz, gaurkoan, nazioarteko ikertzaile ospetsu batzuek... [+]

2024-04-29 | Egoitz Alkorta Miranda

Mundu mailako lapurra

Azeria kanido bat da, otso eta txakurren familiako haragijalea. Animalia zuhur, maltzur eta argiaren fama dauka, eta ez alferrik! Ez da indartsuena izango, baina beti moldatzen da han eta hemen, mokaduren bat lortzeko.

Eguneraketa berriak daude