Legebiltzarrak uko egin dio EH Bilduk eta Elkarrekin Podemos-IUk aurkeztutako proposamenari. Ekimenak, EAJren, PSE-EEren, PP+Cs-en eta Voxen botoak izan ditu aurka. Aldeko bi alderdiek adostutako testuan, monarkiaren amaieraz gain, errege emerituaren ihesaldia gardentasunez azaltzea eskatu du. Baita, ustelkeriagatik, zergak ez ordaintzeagatik eta dirua zuritzeagatik ikertzen ari diren ustezko delituak, modu judizialean ebaztea ere.

Joseba Egibar EAJko bozeramaileak adierazi du, Eusko Legebiltzarra ez dela horrelako gaiak jorratzeko lekua, eta EAEko politika jarduerak "espainolizatzera jotzen dugula" oro har. Azpimarratu du euskaldunok "ez dugula erregerik, ez orain eta ez lehen". Diputatuen Kongresuan errege emerituaren jarduerak ikertzeko batzorde bat babestu duen arren, PPk, Ciudadanosek eta PSOEk "blokeoa" ezarri dutela gogorarazi du.

EH Bilduko ordezkari Jasone Agirrek, "monarkia Francoren oparia" dela esan du eta konstituzioarenkin batera egindakoa, herritarrei galdetu ere egin gabe.

Errege emerituaren ihesaldia delitu eta ekintza askoren ondorioa dela adierazi du Jon Hernandezek, Elkarrekin Podemos-IUko diputatuak.

PSE-EEko Txarli Prieto legebiltzarkideak bestalde, bere harridura azaldu du beste bi alderdien proposamenaren aurrean.  Elkarrekin Podemos-IUren "inkoherentzia" kritikatu du, "Ministroen Kontseiluan eserita" egoteagatik eta, aldi berean, gaia Eusko Legebiltzarrera eramateagatik.

PPri dagokionez, Carmelo Barriok ordezkariak esan du Elkarrekin Podemos-IU itsututa dagoela monarkiarekin, eta gogorarazi du EAJko kide asko Juan Carlos I.arekin argazkian ateratzeko borrokan ibiltzen direla EAEra etortzen denean. Proposamena, gorrotoa zabaltzeko eta gure gizartearen apurtzeko asmoz egina dagoela esan du Barriok. ETAra bideratu du diskurtsoa EH Bilduren aurka jotzeko.

Voxek ere, ETAra jo du monarkiaren defentsa itxia eta Pablo Iglesiasen aurkako eraso gogor egiteko.