> 2018ko lehenengo hiruhileko datuen arabera (EPA inkestari dagozkionak), Euskal Herriko langabezia tasa %10,38koa da (INE), aurreko hiruhilekoan baino 0,3 puntu handiagoa. EUSTATek berriki kaleratutako datuen arabera ere Euskal Herrian langabezia tasa 0,3 puntu igo egin da eta %10,73an kokatzen da. Azken hiruhilekoan langabetuen bolumenak gora egin du lurralde guztietan, oro har.

> INEeko datuen arabera, azken hiruhilekoan langabezia tasa soilik Gipuzkoan jaitsi egin da (0,5 puntu) eta igo gainontzeko lurraldeetan, bereziki Araban (+1,5) eta Nafarroa Garaian (+0,9). Nabarmentzekoa da biztanleria aktiboak Ipar Euskal Herrian eta Gipuzkoan izan duen igoera, hala nola Bizkaian izan duen jaitsiera. Gauzak horrela, Bizkaiak du Euskal Herriko lurraldeen arteko langabezia tasa handiena (%12,61). Hala berresten du EUSTATek ere.

> Azken hiruhilekoan, Euskal Herriko langabezia tasa 0,3 puntu handitu egin da, EB-28ren antzera (+0,2). Hala, bi lurraldeen arteko aldea handitu egin da eta Euskal Herriko langabeziak Europako Batasuneko bataz bestekoa baino 2,9 puntu handiagoa izaten jarraitzen du (INE).

> Azken hiruhilekoaren joeraz harago, Euskal Herriko lan merkatuan langabeziaren eragina apaltzen ari da, baina prekarietatearen itzalak handiegia izaten jarraitzen du.