Kritikak

Ez egin negarrik guregatik. Gogoratu gaitzazue

2010-09-20 02:04:18 | Mikel Garcia

Horixe du helburu Izarren argia pelikulak, gertaturikoa ez ahaztea, Gerra Zibilean emakumeak preso zituzten Saturrarango kartzelan jazotako ankerkeriak azaleratu eta salatzea. Historia handia xume eta txukun kontatu du Mikel Rueda zuzendariak, bere lehenengo film luzean.
 

Baina Saturrarango krudelkeriak nabarmentzeaz gain, dokumentu historikoa izateaz gain, pelikula ere izan nahi du Izarren argiak, eta ongi loturiko tramak ditu horretarako: lapurturiko seme-alabak, torturatuak eta hildakoak, moja gupidagabeak, maitasun istorio bat, matxinada, traizioa… Batzuetan erritmoak behera egiten du, baliabide eskasia nabaria da hainbatetan, antzezpenen bat ez zait gustatu eta sinesgarritasuna falta zaio pasarteren batean… baina oro har interesa mantentzea lortzen du Ruedak, bide onetik eramaten du kontakizuna eta ederto borobiltzen du amaieran.
 
Lehenengo film luzea egiteko historia ikaragarria aukeratu du zuzendari bilbotarrak eta onik atera da. Kamerarekin trebe, lehen planoak, gertukoak atsegin ditu Ruedak, emakume presoen eta moja kartzelarien azpegiak azpimarratuz, batzuen sufrimendua eta besteen zurruntasuna. Beldurra, etsipena, oinazea ez ahazteko modurik onena horixe baita: gertu-gertutik begiratzea.
 
ZABALTEGI SAILA
Izarren argia
Zuzendaria eta gidoilaria: Mikel Rueda.
Aktoreak: Barbara Goenaga, Itziar Lazkano, Klara Badiola, Estibaliz Gabilondo, Amaia Lizarralde.
Euskal Herria. 98 minutu.

 

ERANTZUNAK