Extra! Extra!

Epaimahaia mozkortu daiteke lasai

2011-09-19 00:34:48 | Gorka Bereziartua

Maite ditut maite Sail Ofizialeko epaimahaikideak lanbroak ezkutatzen dizkidanean. Non ezkutatzen diren, ez direnean filmera garaiz azaltzen, orduan hasten bainaiz ezkutukoak, nire baitan pizten diren ostia txar miresgarriak artikulu batean idazten. Haiek gabe ez baita proiekziorik hasten eta Take this waltz filmaren igande eguerdiko pasea ordu laurden atzeratu zen jujeak inondik agertzen ez zirelako.

Non ote zeuden? Kim Ki-duken Amen filmeko dialogo luzeak banaka errepasatzen? Intruderseko mamuaren aurpegia marrazten? Bertsolariren baten bila, Asier Altunaren dokumentala fake bat ez dela ziur esan ahal izateko? Ba ez, nik esango nuke No habrá paz para los malvadoseko poliziak baino gehiago edan zutela larunbat gauean eta gero ez zegoela epaimahaia garaiz mugiaraziko zuen aitaren alabarik, ezta amaren semerik ere. Kursaalaren tamainako ibuprofenoak hartu behar izan zituztela buruan zeukaten Arriya ateratzeko.

Gertatzen da, antzerako egoeran zeudela kazetari asko ere (Begizuloen Nazioarteko Festibala antolatzeko moduan), baina garaiz iritsi zirela, berandu ailegatuz gero, pelikula galduko zutelako. Epaimahaikoei aldiz, filmak itxaron egiten die, mozkortu daitezke lasai. Inork ez zuen esan Zinemaldian hierarkiarik ez zegoenik.
 

 

ERANTZUNAK