Extra! Extra!

"Azkenean, mundu guztiak hartzen ditu armak"

2011-09-17 19:08:01 | Mikel Garcia

Hori adierazi du Nadine Labaki zuzendari libanoarrak prentsaurrekoan. Bere pelikulan, ordea, nola saihestu erakutsi digu, herriko gizonek gudarako armak har ez ditzaten emakumeek antolaturiko plana baitu oinarri. Interesgarria da proiektuaren jatorria: haurdun zegoela, ordu gutxiren buruan gerran sartu zen Libano, egoera absurdoa iruditu zitzaion, une batetik bestera nola aldatzen den dena, eta oraindik jaio ez zen semea armetatik nola babestu pentsatzen hasi zen.

"Nire semea mundu zentzugabe batean jaioko zela sumatu nuen, eta nire familia babesteko beharra sentitu nuen". Behar horretatik sortu zen bi komunitateen arteko elkarbizitza korapilatsua azaltzen duen Et maintenant on va oú? pelikula bikaina. Erlijioak banantzen dituen kristauen eta musulmanen arteko tirabirak modu tragikomikoan jorratu ditu Labakik, eta bitxia da distantzia hartuta zeinen erraz egin daitekeen barre eta negar irudikatutako eszenekin. Berdin egin ahalko ote genuke barre, gertuko egoera ezagunak islatuko balitu?
 
Ez da lehenengo aldia Nadine Labaki Donostiako Zinemaldira etortzen dena. Caramel filmarekin arrakasta eta saria lortu zituen orduan. Film horretan ere, komedia eta tragedia nahastu zituen, muturrak elkarbizitzarako gauza diren adierazgarri. Barnetik bizi direnean, komediatik gutxi izan ohi dute tragediek. Etorkizunean, beharbada, distantziatik, beste era batera begiratuko diegu gure tragedia propioei.

 

ERANTZUNAK