1919. urte hartan jaiotako Zeruko ARGIA, oztopoak eta debekuak ezagutu ondoren, ausardiaz eta indar berriturik kaleratu zen frankismoaren garai ilunetan. 1963an astekari gisa agertu zen berriro 1. zenbakiarekin. Euskal kulturaren berpizkundean aldizkari erreferentziala izan zen eta euskarazko prentsak eta kulturak egin dituzten urrats guztietan protagonista izan da.

Horregatik guztiagatik gertaera hau ospatu nahi izan dugu.

Ospakizun ekintzak, nagusiki, informazioa eta analisia lantzen duen gure astekariaren ildoari jarraiki antolatu ditugu:

- Marka berri bat sortu dugu 2000. zenbakiaren inguruan egingo duguna irudikatzeko. Gure ezaugarriak biltzen ditu: modernoa da, irekia eta "zubia" iradokitzen digu. Gainera, guretzat funtsezkoa den kontzeptua ere zabaldu nahi izan dugu lelo moduan: independentzia. Izan ere, independentzia gure iparra da, informazio askatasunaren berme nagusiena eta egungo mundu globalizatuan norberaren borondatean oinarrituriko interdependentziaren berme, balore absolutua izan gabe.

- Zortzi asteko atal berezia gehitu dugu astekarian: 40 urteko aktualitatea Zeruko ARGIA eta ARGIAren orrietatik ikusia eta gaur egungo begiekin komentatua.

- Kazetari gazteak ezagutarazi eta saritzeko asmoz, erreportaje lehiaketa antolatu dugu. 30 urtetik beherako kazetarientzat da eta hiru kategoria ditu: erreportaje luzea, laburra eta interneterako erreportajea.

- Gainera, "Euskal Herria 2005-2025, nora eta nola?" izenburupean topaketa batzuk antolatu ditugu.

Hori guztia eta beste hainbat elementu SAREKO ARGIAko kanal berezian bildu ditugu. Batetik, ARGIA astekarian argitaratutako atal bereziko erreportajeak ardatz hartuta idatzitako Sarekada bereziak daude irakurgai. Bestetik ARGIA astekariaren azal esanguratsuenak eta 1960az geroztik argitaratutako hainbat artikulu bildu ditugu. Horrez gain, 1960. urtetik 2000. urtera arte izandako gertakari garrantzitsuenak gogorarazi ditugu kronologien atalean.