Agin Rezola

Zergatik niri?

2010-07-12 01:31:00 | Agin Rezola

Zergatik?

Lehen aldia da futbol kronikak idazten ditudana. Zergatik tokatu zait Espainia munduko txapeldun egin den urtean? Zer izan nintzen lehengo bizitzan, hombrerak asmatu zituen diseinatzailea? Kalimotxoari kiwi zukua botatzea okurritu zitzaion tabernaria? Txankletekin galtzerdiak jantzi zituen lehen ingelesa? Zer egin dut nik hau merezi izateko?

Ez da mundial urterik izan aurten bezain txaketeroa izan naizenik. 7 talde ezberdinetako zale izan naiz eta hala ere galdu! Marka da eh? Baina utz ditzadan penak.

Espainiak (jokalariek esan nahi dut, ez zaleek eta gutxiago prentsak) merezita irabazi du Munduko Kopa. Joko azkarra eta sakontasun handikoa egin dute. Lastima da, pantaila plana batean ikusi ditudala partiduak eta hor sakontasuna, ba...
Jokoz gehiago izan zen Espainia, baina Herbehereek eduki zituzten euren aukerak, batez ere Arjen Robbenen oinetan.
Entzun dut espainolak herbeheretarren aldagelan sartu eta takila batean lapurreta egin dutela. Euren burua justifikatzeko esan dute, takila horretan Robben jartzen zuela. Ezin sinistuta, espainolen kapitaina bere abizenetik (Casillas) irten da.
Partiduari buruz hitz egin nahi nuen, baina por los Ramos... barkatu, por las ramas joan naiz. Zergatik? Ba, nahi gabe ere irakurriko, ikusiko edo entzungo duzuelako zer gertatu zen, egon lasai. Hori dela eta, gaur emaitzarik ez jartzeko lizentzia hartu nahiko nuke. Altxa buruak! Luis XVI.a errege frantsesari gauza bera esan zioten 1793an, baina...