Aurrerapauso nabarmenik gabe baina martxan dihardute Israel Gazako palestinarren aurka egiten ari den genozidioa eteteko negoziazioek: Egipto, Qatar eta AEBak ari dira jarduten Israelen eta Hamasen arteko bitartekari gisa, bi aldeek ontzat ikusi ditzaketen menia akordioak planteatu eta proposatuta. Joan den astean, erakunde palestinarrak iragarri zuen Kairok eta Dohak eginiko azken proposamena onartu zuela, besteak beste, 60 eguneko su-etena eta Hamasek bahituta dituen 50 israeldarrak –horietatik 20 inguru bizirik leudeke– euren etxeetara itzultzea barne hartuko lukeena. Israelek, ordea, menia proposamen horri uko egin eta Gaza hiria osorik okupatzeko asmoarekin jarraitzen du, egunak igaro ahala hiri horren aurkako erasoak gogortzearen bidez.

Egiptoko Gobernuko gertuko iturri batek EFE berri agentziari adierazi dioenez, herrialde horretan biltzekoak dira astelehenean Marco Rubio AEBetako Estatu Idazkaria eta Israel Katz Israelgo Atzerri ministroa. Bilera horretan, Gazarako su-etenerako akordio posibleez gain, zerrendaren "etorkizunerako" gakoez mintzatuko dira Rubio eta Katze. Esaterako, Egiptok eta PAN Palestinako Aginte Nazionalak osatutako "segurtasun indarren" balizko eraketaz. Bitartean, igandetik astelehenera bitarte Israelek 51 palestinar hil ditu Gazan, horietatik 27 Gaza hirian. 

Hain zuzen, NBE Nazio Batuen Erakundearen agentzia batek, IPC Jakien Segurtasunaren Faseen Sailkapen Integratuak, ostiralean kaleratutako txosten batean ohartarazi zuen zerrenda iparraldean, Gaza hirian eta inguruan, "gosete larria" pairatzen ari direla. Agentzia horrek elikadura gabezia sailkatzeko 1etik 5erako eskala darabil, eta jakinarazi du Gaza iparraldean gosetea azken mailan dagoela. Gazako Osasun Ministerioaren arabera, Israelek maiatzetik zerrendara bidalitako laguntza humanitarioari ezarritako blokeoaren ondorioz 300 palestinar hil dira gosez, horietatik 117 haurrak.

Herbehereetako Atzerri ministroak dimisioa eman du, Israeli zigorrik ezarri ezinda

Urriaren 29an egingo dituzte hauteskunde orokorrak Herbehereetan, eta egun agintean dagoen gobernua erabat hautsita helduko da bozetara. Geert Wilders eskuin muturreko buruzagiak haren alderdia –PVV Askatasunaren Aldeko Alderdia– aginteko koaliziotik irtetea erabaki zuenetik, jarduneko gobernu gisa ari da Dick Schoof lehen ministroa buru duen kabinetea, eta joan den astean lau ministrok utzi dute euren kargua: Barne, Osasun, Hezkuntza eta Atzerri ministroek –laurak NSC Kontratu Sozial Berria alderdikoak–. Azken horrek, Caspar Veldkampek, Israeli zigorrik ezarri ezin izanagatik eman du dimisioa.

Gazako genozidioaren harira, joan den astean Tel Avivi zigorrak ezarri nahi zizkiola adierazi zuen Veldkampek Ordezkarien Ganberan. Haren alderdiarekin batera herrialdeko gobernua osatzen duten eskuineko alderdietako –VVD Askatasunerako eta Demokraziarako Herriaren Alderdia eta BBB Nekazarien eta Herritarren Mugimendua– ordezkariek, ordea, ez zuten babestu proposamena, eta Atzerri ministroak kargua utzi zuela iragarri zuen ostiralean. "Ezin izan dut beharrezkoa jotzen dudan bidea hartzea lortu", adierazi zien kazetariei erabakia iragarri ostean.

Zisjordanian 3.000 olibondo izorratu ditu Israelgo armadak

Gazako palestinarren aurka soilik ez, Zisjordanian bizi direnen aurka ere oldartzen jarraitzen du Israelgo armadak: asteburuan gutxienez 3.000 olibondo izorratu dituzte Zisjordania iparraldeko Al-Mughayyir herrixkan, Ramallah hiritik gertu. Israelgo armadak argudiatu badu ere segurtasunerako "mehatxua" zirela, finean, mendeku gisa egin dute erasoa soldadu israeldarrek: izan ere, joan den astean kolono israeldar baten aurka oldartu zen herrixka horretako palestinar bat, eta Israelgo armadako buruzagietako bat den Avi Bluthek ohartarazi zuen herrixkako palestinarrek erasoa "garesti ordainduko" zutela.

Israelen okupaziopean olibondoek berebiziko garrantzia dute Zisjordaniako palestinar gehienen biziraupenean, bai ekonomikoki eta bai kulturalki: hango biztanle ugariren iturri ekonomiko nagusia da eta, horrez gain, eurentzako balio handia duen ondarea da. Horregatik, Zisjordaniaren okupazioari ekin zioenetik, Israelgo armadak nahiz eremura lekualdatu diren kolono israeldarren 11 eraso pairatu dituzte: NBEren Gai Humanitarioak Koordinatzeko Nazio Batuen Bulegoaren arabera, 2023an gutxienez 10.000 olibondo izorratu zituzten.