Foruzaingoak larunbatean aurkitu zuen emakumea bere etxean zaurituta, eta ospitaleratuta zegoela hil da, astelehenean. Bere senarra atxilotu dute, hiltzailea izan daitekeelakoan. Gasteizen beste gizonezko batek bere bikotea labanaz zauritu du.
Larunbatean larrialdi zerbitzuetara deitu zuen Huarteko Zarraondoa kaleko biztanle batek, hildako emakumearen senarra zenak. 41 urteko gizonak bere emaztea dutxan laban eginda erori egin zela eta konortea galdu zuela helarazi zien telefonoz. Larrialdi zerbitzuak eta Foruzaingoa, biak hurbildu ziren bikotearen etxebizitzara. Emakumea zauriturik aurkitu zuten, kolpeek eraginak zirela ziruditen zauriekin. Gizonak ere zenbait zauri zituela antzeman zutenez, indarkeria matxista kasu bat izan zitekeelako hipotesia mahai gaineratu zuten.
Emakumea Nafarroako Ospitale Gunera eraman zuten, eta ikerketa zabaldu zuen Foruzaingoak. Galdeketa egin ostean, gizona atxilotu zuten. Ikerketarekin aurrera egin eta asteartean Agoizko auzitegira eraman dute, Emakumeen Aurkako Indarkeriaren 1. Epaitegira.
Foruzaingoak jakinarazi duenez, gizonezkoak sarri egiten zizkion tratu txarrak hildako emakumeari.
Beste eraso bat Gasteizen
Asteartean beste eraso matxista bat jazo da Gasteizen, ostirala geroztik hirugarrena. Etxean egin dio eraso bikotekide emakumeari 42 urteko gizonezkoak, eta ostean bere burua jaurti du lehen pisuko balkoitik.
Hirugarren batek emandako abisua tarteko hurbildu dira ertzainak bertara, eta kalean aurkitu dute gizona, lurrean, hankak zaurituta. Emakumea aldiz odoletan aurkitu dute etxean, eta bikoteak labanaz eta botila batekin bularrean eta buruan zauritu duela jakinarazi du. Txagorritxuko ospitalera eraman dute, eta Ertzaintzak gerora jakinarazi duenez, salaketa jarri du.
Gizona Santiagoko erietxera eraman dute balkoitik salto egitean hanka apurtu duelako. Ertzaintzak atxilo dauka.