Azpeitiko plazan egin dute elkarretaratzea, Elkar-ekin taldeak deituta eta hainbat eragile sozial, politiko eta sindikalen babesarekin. Udaletxeak ere deitu zituen herritarrak mobilizazioan parte hartzera. Sorianoren gurasoak plazara bertaratu dira.

Hamar minutuko isilunearen ondoren, Elkar-ekineko kideek hatu dute hitza lehenbizi. Hiru urte direla Euskal Herrira heldu zenetik Sorianok lantegian bizi izan duen “infernua” ez dela kasu isolatua azaldu dute, kapitalismoarekin eta arrazakeriarekin lotuz. “Justiziazkoa den gizarte baten” alde lan egitera deitu dute. Bestetik, Sorianoren heriotza “ikertzeko eta erantzukizunak argitzeko” beharra azpimarratu dute  –Uztarria komunikabideari adierazitakoaren arabera, Ertzaintzak ikerketa bat du irekia–.

Sorianoren amaren hitzak

Sorianoren amak hartu du hitza ondoren. Azpeitiko Udalari, herriari, eta bertaratutako herritarrei eskerrak eman dizkie eta, semea gogoan, horrelakorik berriz ere ez gertatzeo borroka egitera deitu du: “Aurrera egin behar da. Borrokan jarraitu behar da Luis Enriqueri pasatu zitzaiona berriz gerta ez dadin. Esplotazioaren eraginez, begira zer gertatu zaion nire semeari; nire semea ez dago hemen jada”.