2017ko urriaren 1ean burutako erreferenduma eta poliziak herriaren kontra erabilitako indarkeria gogoan dituzte astelehen honetan Katalunian, eta urtemugaren harira hainbat mobilizazio deitu dituzte. Eguneko lehen orduetatik hasi dira CDRak (Errepublikaren Defentsa Batzordeak) martxan, eta ekintza mordoa burutu dituzte. Aurreko egunetan ohartarazi zuten egun osoan zehar hainbat ekintza egingo zituztela.

Bartzelonara doazen hainbat errepide moztuaz ekin diote urriaren 1ari, eta aurreikuspenen arabera, errepide ezberdinak mozten dabiltzan zutabeek hiriaren erdigunean bat egingo dute.

Girona eta Bartzelona arteko AHT trenaren zerbitzua ere eten egin dute. Pare bat orduz blokeoari eutsi eta gero, mobilizazioarekin aurrera jarraitzea erabaki dute. Gironan bertan, Generalitatearen delegazioan, Espainiako bandera erretiratu dute, bideoan ikusi daitekeenez:

Acabem de despenjar la bandera espanyola de la delegació de la Generalitat a #Girona. El poble mana, el govern obeeix! #1OctAlCarrer #FemLaRepúblicaCatalana #1Oct #TombemElRègim #1O pic.twitter.com/jWbcRUOXEZ

— CDR.Vidreres (@CDR_Vidreres) October 1, 2018

Bestetik, AP-7ko Matorelleko ordainlekuko langak erretiratu dituzte, autoei bidea zabalduz.

Manifestants obren els peatges de l'AP7 a Martorell pic.twitter.com/IfLV55f4gb retirant les barreres #1OctAlCarrer

— L'Accent (@laccent) 2018(e)ko urriaren 1(a)

Etxe kaleratze bat gelditzeko geldialdia ere egin dute Bartzelonako Nou Barris auzoan. Bertan bizi diren hiru pertsonak etxetik kanporatuak izatea eragotzi dute.

Els CDR aturen el desnonament previst al carrer Cadí de Barcelona. Ara baixaran fins a la manifestació convocada a les 12 del migdia als jardinets de Gràcia https://t.co/a8Bs4lyBam #Jornada1O pic.twitter.com/fB9CkCJqsv

— Jornada (@DiariJornada) 2018(e)ko urriaren 1(a)

Hiriburuan, botere ekonomikoaren egoitzen kontra ere egin dituzte ekimenak. Espainiako Bankua, Zerga Administrazioko Estatu Agentzia eta Kataluniako patronala –Foment del Treball Nacional– izan dituzte jo puntu. Besteak beste, “Bota dezagun erregimena” lemadun pegatinak eta “Subiranotasun ekonomikoa, kanpora Espainiako Bankua” edo “Bota dezagun 78ko erregimena. Independentzia. Errepublika” zioten pankartak ikusi ahal izan dira ekimenotan. “Desobedientziarik barik ez dago independentziarik”, “Ez Frantzia ez Espainia, Herrialde Katalanak” edo “Ez ahanzturarik, ez barkamenik” lemak aireratu dituzte. Larunbateko polizia kargengatik Miquel Buch i Moya Herrizaingo sailburuaren dimisioa ere eskatu dute.

12:00etan CDRen manifestazio bateratuari ekin diote Passeig de Graciatik, eta Universitats per la Republicak (Errepublikaren aldeko Unibertsitateak) deitu duen 24 orduko grebaren baitan antolatutako manifestazioari ere babesa adierazi diote.

Eguerdan, Bartzelonako Burtsara eraman dituzte aldarrikapenak. Bi pertsona kateatu egin dira eta ehun bat pertsonak eraikinera sarrera blokeatu dute.  “Jendearen errepublika nahi dugu, ez kapitalarena”, irakurri daiteke Sagrera, Navas eta Congres auzoetako CDRak ekintzaren berri ematen zabaldu duen txioan.

Asseguts a la borsa, #AturemElPaís #1OctAlCarrer #resistència
Volem una República de la gent, no pas del capital pic.twitter.com/ka7iYzYSGw

— CDR SagreraNavasCongrés (@Cdr_nv_sg_cgr) 2018(e)ko urriaren 1(a)