Aingeru Epaltza idazleak Diario de Noticias egunkarian gogorarazi du, bihar beste behin, Nafarroako oposizioetan ingelesa jakitea baloratuko dela, eta aldiz, euskara batere ez. Sindikatuek eta euskalgintzak kontra indar gutxi egin dutela ere salatu du.
Epaltzak dioenez, 35 deialditan, 210 lanpostutarako, erabili da hizkuntzak baloratzeko sistema hau: “Ia sindikatuen oposiziorik gabe (ELA, non egoten zara halakoetan?), eta euskararen aldeko mugimendu antolatuaren aldetik ere gutxi, oso gutxi”.
Arartekoak bi herritarren kexak jaso ditu eta haiei arrazoia eman die. Ordea, Arartekoak esandakoa ez da loteslea eta Epaltzak dioenez, “gobernuari Arartekoaren aholkua belarri batetik sartu eta bestetik atera zaio. Larunbat honetan, apirilak 26, NUPen Ogasuneko kudeatzaile eta ikertzaile laguntzaile izateko oposizioa hasiko da. Ingelesarekin. Euskararik gabe. UPNk Nafarroa amesten duen moduan”.
ARGIA astekariko artikuluan Ander Perezek kontatu zuenez, 2010ean hainbat sindikatuk, Behatokiak eta Administrazioan Euskaraz Taldeak Nafarroako Gobernuak oposizioetan ingelesa baloratzen zuela ohartarazi zuten.
Lanpostu publikoa lortzeko proba haietan merituak ez ziren kontuan hartzen, eta aldiz, ingeleseko azterketa zegoen. Beraz, ingelesa jakitea ez zen derrigorrezkoa, baina ingeleseko proba gainditzen zuenak proba orokorrean lortutako emaitzari %10erainoko puntuazioa gehitzeko aukera zeukan.