MAITASUNAREN BILDUMA euskarazko raparen historiaren diska garrantzitsuenetako bat bihurtuko da zalantza izpirik gabe. Jarrera, originaltasun, hizkera esplizitu eta iparrameriketako 90eko eta 2000. Urteetako raparen une oroko erreferentziei esker berehalako klasikoa izango da.

Arrano Pertxa raperoa eta Lengu Iluna ekoizlea elkarrekin dabiltza 2017 urte geroztik euskarazko rap proiektu honetan. Letra erasokorretan eta Europako hizkuntzarik zaharrenean sekula entzun ez diren gaietan datza bikote honen originaltasuna. Hori guztia Lengu Ilunak sortutako musikaren gainean: G-Folk izendatu duten soinu propioa garatu dute, rap klasikoa eta euskal folklorea uztartuz.

2018ko urtarrilean euren lehenengo bilduma kaleratu zuten: “Jaungoikoa, dirua eta erritmo zaharra” (Taupaka, 2018). Gansta rap eta euskal bizimodu tradizionalaren, krimenaren eta drogen inguruko erreferentziez josita dago bilduma.

Euskal Herriko geografian barrena urtebete kontzertuak ematen igaro ostean, 2019an sei single berri plazaratu zituzten, eta urte amaieran “Euskalabria 2019” izeneko EPan bildu zituzten.

Aurreko diskaren kodeari eutsi zioten, nahiz eta ekoizpen minimalistagoa eduki. Hala ere, raparekiko leialtasuna gorde zuten.

Gaur azken bilduma aurkezten du taldeak, “Maitasunaren Bilduma”, (Taupaka, 2020). 12 kantetan testu pertsonalagoak eta soinu garbiago eta erlaxatuagoak jorratu dituzte. Beraien nortasunaren adierazgarriak alboratu barik, aurreko bi lanen garapenaren ondorio argia da azkeneko hau.

Maitasunaren bilduma euskarazko raparen historiaren diska garrantzitsuenetako bat bihurtuko da zalantza izpirik gabe. Jarrera, originaltasun, hizkera esplizitu eta iparrameriketako 90eko eta 2000. Urteetako raparen une oroko erreferentziei esker berehalako klasikoa izango da.

Gorabehera emozionalen istorioa da bilduma. Arrano Pertxak bizitzako kontu garrantzitsuez eta kontraesanez gogoeta egingo du. Bide horretan maitasuna modu organikoan azaleratuko da, eta familiari, ingurukoei, musikari eta jakintzari dien maitasunean islatuko da edozein belarrik jasan ezingo duen kode oso raperoan.

Oraingoan Lengu Ilunak ezereztik sortutako kalitate eta aniztasun paregabeko 12 instrumentalek lagunduko dituzte letrok. Erritmo oso raperoek eta askotariko sampleek batzuetan funk kutsua emango diote diskari, besteetan jazz edo rap ilunenarena. Grabazioa, nahasketa eta masterra Lengu Ilunaren lana dira.