Europako Parlamentuak 2019ko azaroan aitortu zuen larrialdi klimatikoa, beste erakunde publiko batzuek une hartan egin zuten bezala. Benetako adierazpena baino, propaganda izan zen gehiago, gerora onartutako politikek zerikusi gutxi baitute ekonomiaren benetako trantsizio ekologikoarekin. Urte bereko abenduan, Europako Batzordeak Europar Batasuneko Itun Berdea aurkeztu zuen, Green New Deal Europarra izenez ezagunagoa. Plan horrek klima aldaketaren aurka borrokatzeko berrogeita hamar ekintza zehatz biltzen ditu, eta Europa "klimatikoki neutroa" den lehen kontinentea bihurtu nahi du 2050erako, eta bitartean 2030erako emisioak % 50 edo % 55 jaitsiz.