LAB sindikatuko idazkari nagusi Garbiñe Aranburu elkarrizketatu dute Radio Euskadin, Boulevard saioan, koronabirusaren ondorioz bizi dugun egoerari buruz hitz egiteko. Enpresen politiketan prebentzioa ez dagoela erdigunean salatu du, eta, konfinamendutik noiz eta nola irtengo garen oraindik jakiterik ez dagoen arren, langileok antolatzea eta borrokatzea beste biderik ez dugula izango nabarmendu du. "Enpresa mailako borroketatik harago, mobilizazio orokorragoak beharko ditugu egin. Zentzu honetan, balorean jarri behar dugu eragileen artean dugun aliantza, Euskal Herriko Eskubide Sozialen Kartaren bitartez".