Ikasleen artean gogoa, eta irakasleen artean ardura gailendu dira ikasturte hasiera zail honetan. Oro har esanda, ikasleak gogoz itzuli dira, jarrera oso onarekin, neurri berriekiko errespetuz eta, oroz gain, ikaskideak eta lagunak ikusteko irrikaz. Irakasle eta, batik bat, ikastetxeetako zuzendaritza-taldeen artean lehen asteetako kezka koronabirusa saihesteko harturiko neurrien ingurukoa izan da, kontingentzia-planak ezartzeak xahutu ditu orduak. Eta kezkarekin batera kexua eta arrangura datoz, ez daukate aski baliabide (batik bat giza baliabide) egoerari behar den bezala aurre egiteko: aurreko urteetako baliabideekin ekin behar izan diote pandemia baten erdian ikasturteari. Familien artean, zabalagoa da abanikoa, baina, oro har, konfiantzarekin hasi dute kurtsoa.