Martxoaren 6tik 17ra izango da Nafarroako eskoletan aurrematrikula egiteko garaia eta Nafarroako euskalgintzako hainbat eragilek eta mugimenduk D ereduan matrikulatzeko kanpaina abiatu dute. Zerotik aurrera aukeratu euskara! lelopean familiak haurrak euskarazko ereduan matrikulatzera bultzatu nahi dituzte, une hau delako “familiek haurrentzako nolako etorkizuna nahi duten erabakitzeko garaia”. Argi dute euskararen aldeko hautuak aberastasuna dakarrena, “eleaniztasunerantz urratsak eg iteko aukerak zabaltzen baitizkigu. Eta horrekin batera, aniztasunari, elkarbizitzari eta etorkizunari ateak irekitzeko hautua da euskara”.

Bi astetan zehar kanpaina hau bultzatzen arituko dira Euskalgintzaren Kontseilua, Hizkuntz Eskubideen Behatokia, Sortzen elkartea, NIZE, HE Gurasoak, LAB, ELA, Steilas, AEK, IKA, Eremu Diskriminatutako Gurasoak, Zaldiko Maldiko eta AET.