Zutabea: Teorizariorik ez. Aipurik ez. Juzkurik ez. Abenduaren 28 batean egin nintzen ama. Bortz minuturen aldearekin jaio ziren bi umeren ama. Haurdunaldian zehar ez nuen umeen hazkuntzari buruzko ezer irakurri, eta ez nintzen erditze aurreko prestakuntzetara joan. Ez zen hautu kontziente bat izan. Horrela suertatu zen. Jaioberrien unitateko gailuen zaratak jasangaitzak egin zitzaizkidan hamabortzgarren egunaz geroztik. Eta bitartean, oraindik umerik gabeko etxearen isiltasunean hartu nuen arnas. Zortzi hilabeteren ostean, zaintzaz gaindiko lanetara bueltatzea erregutu nion neure buruari, buru hori bera bertan aurkituko nuelakoan. Ez zegoen han.