Lehenik eta behin, hildakoaren senitarteko eta hurbilekoei babesa eta elkartasuna adierazi nahi die ELAk, baita enpresako langileria osoari ere.
Hasi berri dugun 2019.urte honetako lehen istripu hilgarria da hau. Aurreko urteetan ikusi dugun bezala, lan istripu ez traumatikoek gorakada itzela izan dute azken urteotan prekarietate eta lan baldintzen okertzearen ondorioz. Administrazioek eta prebentzioan aritzen diren instituzioek ere datu larri hauen atzean zer dagoen ikertu beharko lukete neurri egokiak jartze aldera, neurri horiek patronalen interesen kontrakoak badira ere.
Ez dugu nahi aurten ere, iaz bezala, beste 67 langilek bere lanpostuetan bizitza galtzea. Egoeraren larritasunaren aurrean, ELAk Euskal Herriko langileria eta gizarte guztia deitzen du antolatzera eta mobilizatzera, bai enpresetan, baita kalean ere, lan ezbeharrak eta lan gaixotasunak desagerraraziko dituen lan baldintza duinak lortzeko helburuarekin, eta etxera bizirik itzultzeko eskubidea bermatzeko.