Koronabirusak jota hil den Osakidetzako erizainaren berri tamalgarriaren aurrean, SATSE, ELA, LAB, SME, CCOO, UGT, ESK, SAE eta UTESEk ezinbestekotzat jo dute, berriz ere, Osakidetzak norbera babesteko ekipamenduen eta langileen segurtasuna eta osasuna babesteko beharrezkoak izan daitezkeen gainerako materialen hornidura bermatzea. Halaber, langileei prestakuntza eta informazio nahikoa eman behar diela ere berretsi dute.

Azpimarratu dute, beste behin ere, laneko segurtasunak eta osasunak bateragarriak izan behar dutela lanarekin eta herritarrei funtsezko zerbitzua eskaintzearekin. "Lan-jardueraren ondorioz gertatu den zoritxarreko gertaera honen aurrean ezinbestekoa da Osakidetzak norbera babesteko ekipamenduen eta plantillaren segurtasuna eta osasuna babesteko beharrezkoak izan daitezkeen gainerako materialen hornidura bermatzea. Langileei prestakuntza eta informazio nahikoa ere eman behar die ", nabarmendu dute.

Gaineratu dute Eusko Jaurlaritzak eta Osakidetzak berak plan bat artikulatu behar dutela, segurtasun neurriak betetzen direla bermatzeko. "Ezin dugu hornidurarik gabeko eszenatoki bat onartu. Horregatik, behar diren materialen erabilgarritasuna bermatzeko plan bat behar da", diote. Langileen segurtasuna eta osasuna bermatu behar dela ziurtatu dute, uneotan hain beharrezkoa den osasun-laguntza ere eman daitekeela bermatzeko.

"Eusko Jaurlaritzari eta Osakidetzari berehala jarduteko exijitzen diegu. Ahalegin guztiak funtsezko zerbitzuetan segurtasuna bermatzera bideratu behar dira, zerbitzu horiek, nahitaez, funtzionatzen jarraitu behar baitute".

Elkartasuna adierazteko eta Osakidetzari berehalako neurriak har ditzala eskatzeko, datozen bi egunetan krespoi beltz bat eramateko eta leihoetatik trapu beltzak zintzilikatzeko eskatu diete langileei. Era berean, langileei dei egiten diete martxoaren 20an, 12: 00etan, jarduera gelditzeko eta hildako lankideak 5 minutuko isilunea egin dezan.