Gasteizen, Eusko Jaurlaritzaren egoitzaren aurrean egindako elkarretaratzean, ELAk, LABek, CCOOk eta UGTk gogorarazi dute, Lakuan soilik, 1.200 langile baino gehiago itzuli behar izan direla beren lanpostuetara, aurrez aurre, nahiz eta langile asko etxetik telelanean ari ziren, prebentzioagatik. Aldez aurreko plangintzarik gabe hartutako neurri horrek langileak arriskuan jartzen dituela salatu dute, eta zerbitzu publikoa denez, baita herritar guztiak ere. "Bereziki kezkatzen gaitu jendearentzako aurrez aurreko arreta ematen duten lantokiak berriz irekitzeak, kontuan hartuta Eusko Jaurlaritza hartzen ari den neurriak ez direla inondik ere nahikoak eta arrapaladan diharduela", baieztatu dute. Zentzu horretan, mezua bidali diote Eusko Jaurlaritzari: "Zergatik ez zaizkie egiten testak langileei, eta bereziki, jendeari aurrez aurre arreta ematen lan egiten dutenei?".

Salatu dutenez, behartuta, presaka eta behar bezala planifikatzeke dagoen laneratze hau bereziki larria eta deigarria da EAEko beste administrazio eta lantoki batzuetan egiten ari diren laneratze-prozesuekin alderatzen badugu, eta zer esanik ez Nafarroakoarekin edo beste autonomia-erkidego batzuetako prozesuekin alderatzen bada.

“Asko kezkatzen gaitu Jaurlaritzak hitz egiteko eta adosteko duen ezintasunak, eta are gehiago, lanpostuetara itzultzea bizkortzeko presak (eta ez lanera, ia etenik gabe ari baikinen lanean) posible izan den kasu guztietan”. Gaineratu dute eredugarria izan dela langileek zerbitzu publikoarekiko erakutsi duten prestasuna eta konpromisoa.

ELAk, LABek, CCOOk eta UGTk ziurtatu dutenez, langileen lan-baldintzen eta iragarritako prebentzio-neurrien jarraipen zehatza egingo dute, eta egoera hori salatzeko formulak proposatuko dizkiete langileei, egoeraren arabera.