ELAk salatu duenez, Jaurlaritzak EAEko hezkuntza-sistema aurrera atera nahi izan du, lan-gainkargaren, gehiegizko ahaleginaren, irakasleen eta gainerako hezkuntza-langileen baldintzen prekarizazioaren eta familien inplikazio-mailaren kontura. "Hori guztia Jaurlaritzaren ardura ez balitz bezala, kalitatezko hezkuntza sistema inklusiboa, berdintasunezkoa, euskalduna eta pertsonen garapen integralaren bermatzailea ematea", diote. Eta hori, nabarmentzen dutenez, agerian geratzen ari da salbuespenezko krisi-egoera honetan, non, ikasleen hezkuntza-ibilbidea bermatzeko, zama guztia langileen eta familien gainean jarri baitute, azken asteotan bizi izan diren egoera hauetan islatzen den bezala:

• Ikasleen hezkuntza-ibilbidea bermatzeko telelana berehala ezartzeak irakasleak eta hezitzaileak lan-karga gehigarri nabaria beren gain hartzera eraman dituen bitartean, Hezkuntza Sailak lehen egunetik hartu du beharrezko ordezkapen guztiak ez gauzatzeko erabakia.
• Egoera horretan, gordinago azaleratzen ari dira jatorrizko aldeak ikasleen maila sozioekonomikoaren arabera. Aurrez aurreko eskolak etenda dauden bitartean, Hezkuntza Sailak on-line ikasketak bermatu nahi ditu, baina ez ditu familien esku jarri ikasleek eta familiek eten hori gainditu ahal izateko neurri eraginkorrak (ordenagailuak eta konexio-sareak gaitzea, esaterako). Gizartearen presioari esker zentzu horretan pauso batzuk ematen hasiko dela dirudien arren, gaur arte arazoa familiena balitz bezala jokatu du, eta ez Gobernuen murrizketa politikena.
• Irakaskuntza publikoko irakasle funtzionarioen arteko bitartekotasun-maila %30etik gorakoa den une honetan, langile horietako asko egungo egoerak eskatzen dien kargarekin ari dira lanean, eta salbuespenezko egoerak eragindako aparteko kontziliazio-beharrei erantzuten ari dira (haurrak etxean egotea eta nagusiki etxetik ikastea). Horrela, ia ez dute astirik dagoeneko deitutako LEPa prestatzeko. Hala ere, Eusko Jaurlaritzak oraindik ez du erabakirik hartu, ezta jakinarazi ere, hasiera batean ekainerako aurreikusita zegoen oposizio hori egiteko datari buruz. Gauzak horrela, ELAk uste du Hezkuntza Sailari eska dakiokeen gutxienekoa dela hautagaiek eskubidea izatea beren ikaskuntza-prozesua eta denborak planifikatzeko, baita data aldatzeko ezinbesteko prozesuan ahalik eta kalte txikiena jasateko ere.
• Sukaldeko eta garbiketako langileen kasuan, Jaurlaritzak langile horiek euskalduntzeko prozesuari ematen dion garrantzia, eta hezkuntza publikoan lan-baldintza prekarioagoak dituzten kolektibo horien baldintzen garrantzia azpimarratu ditu ELAk. Izan ere, sektore horietan euskara ikasteko liberazioak bertan behera utzi ditu, beste sektore batzuetan egin den bezala on line ikasteko aukera eman gabe. Gainera, etenaldi hori erabili du postu horiek betetzen ari ziren ordezkoak kaleratzeko.
• Eusko Jaurlaritza arriskuan jartzen ari da garbiketako langileen osasuna eta segurtasuna, eta lantokietako garbitasuna bermatzeko behar baino langile gehiago lanera joatera behartzen ditu, aurrez aurreko ikaskuntza etenda dagoelako.

ELAren arabera, Koronabirusak eragindako krisiak agerian utzi du zerbitzu publiko sendoak izatearen garrantzia. Hala, gogorarazi dute azken urteotan gure zerbitzu publikoen murrizketek, oro har, eta gure hezkuntza-sistemarenak bereziki, ez dutela lagundu krisi honi modurik eraginkorrenean aurre egiteko orduan. "Eta horri gehitu behar zaio Espainiako Estatuak ezarritako arau eta erabakiei men egiteko erabakia, erabat birzentralizatzaileak, erregresiboak eta murriztaileak baitira", azpimarratu du ELAk.

Osasun-krisi honetan, hezkuntzako langileak hezkuntza ahalik eta modu egokienean bermatzen saiatzen ari direla ziurtatzen du, bai ikasleentzat, bai familientzat eta, oro har, gizartearentzat. "Baina ez dugu onartuko krisi hau gure hezkuntza sistema eta gure lan baldintzak kaltetu eta ahultzeko aitzakia gisa erabiltzea, ezta hezkuntza sistema baliabide eta eskubideez husteko ere", ondorioztatzen du.