Egoiliarren senideen elkarteak eskatzen ari diren bezala, ELAk Eusko Jaurlaritzari eskatzen dio beharrezko neurri guztiak har ditzala osasun-krisi honetan zehar senitartekoek eta egoiliarrek tratu gizatiar eta duina izan dezaten bermatzeko. "Gobernuari eskatzen diogu ministerio-aginduan xedatutakoa bermatzeko eta hobetzeko ebazpenak, xedapenak eta jarraibideak eman ditzala, bai eta presaz eta berehala langile gehiago kontrata ditzala ere". ELAk salatzen du martxoaren 19ko Ministerio Agindua; izan ere, ezin dira bete, baldin eta adinekoen egoitzak eta zentro sozio-sanitarioek ez badute langile kopurua handitzen.

Era berean, ELAk berriro esaten du beharrezkoa dela, gutxienez, egoitza eta zentro sozio-sanitario guztietan prebentzio-neurri hauek betetzea:

• Berehala testa egitea egoitzetako eta zentro soziosanitarioetako egoiliar eta langile guztiei.
• Norbera babesteko ekipamenduen berehalako hornidura: maskarak, eskularruak, mantalak, betaurrekoak. Erakundeen betebeharra da hori bermatzea.
• Langileei prestakuntza egokia ematea protokoloen jarraipenari buruz.
• Instalazio guztiak desinfektatzeko ezohiko neurriak hartzea: espazio komunak, gelak, sukaldeak, garbitegiak...
• Ikuskapen-kontrolak berehala aktibatzea, ezarritako protokoloak betetzen direla zaintzeko.

ELAk, azkenik, gogorarazi nahi du langileek sektore horretan duten langile-falta eta lan-karga izugarriak egiturazkoak direla, eta zuzeneko arretaren/erabiltzailearen ratio argi eta garbi nahikorik ez izatearen ondorio direla. Ratio horiek Eusko Jaurlaritzak eta aldundiek bultzatutako foru-dekretuen eta foru-aginduen emaitza dira, eta gehiago bilatu dituzte enpresa-onura eta negozioa, sektoreko langileentzako lan-baldintza duinak eta egoiliarrentzako asistentzia-kalitate egokia baino.