ELAk gogorarazi du 2020ko urtarrilaren 30eko greba orokorrean pentsio publikoen sistema nabarmen hobetzea aldarrikatu genuela, besteak beste. 1.080 euroko gutxieneko pentsioa eta Zapateroren eta Rajoyren pentsio erreformetan onartutako murrizketak bertan behera uztea eskatzen dugu, besteak beste, erretiro adina 67 urtera atzeratzea, erretiro aurreratua gogortzea eta pentsioa kalkulatzeko kontuan hartzen diren kotizazio urteen kopurua handitzea. Pedro Sanchezen gobernuak entzungor egiten die aldarrikapen horiei, eta pentsioen erosteko ahalmenaren bermea bakarrik eta oso modu deskafeinatuan onartzen du.

Espainiako Gobernuak Bruselari aurkeztu dizkio murrizketa horiek, Europako funtsak jaso ahal izateko. Berriro ere, ELAk hasieratik salatu zuenez, egiaztatuta geratu da funts horiek gizarte- eta lan-eskubideen murrizketen eta austeritateko aurrekontu-politiken aplikazioaren mende daudela. Funtsak murrizketen mende dauden bitartean, hala nola pentsioena, baztertu egin behar dira.

ELAk dei egin die indar politiko guztiei, eta bereziki ezkerreko indarrei, neurri horiek erabat arbuiatzeko eta horien aurka bozkatzeko konpromisoa hartzeko.
Azkenik, ELAk iazko greba orokorraren aldarrikapenak defendatzen jarraitzeko konpromisoa agertu du, mobilizazioaren eta borrokaren bidez.