Espainiako Gobernuak proposatutako aurrekontu egonkortasunerako helburuak (2020-2023) onartu ditu Espainiako Kongresuak. Helburu horien artean dago gastu-araua (aurrekontuaren igoeraren gehieneko ehunekoa, erakunde guztiei eragiten diena, autonomikoak, foralak edo udalekoak barne). 2020rako, PSOEren Gobernuaren eta Unidos Podemosen proposamena% 2,9ko igoera da, Rajoyk 2020rako onartutako% 2,8a baino hamarren bat gehiago. Gainera, erakunde guztiek bete behar dituzte defizit pubilkoaren eta zor publikoaren mugak ere.

Azken urteotan, Hego Euskal Herriko erakundeak aurrekontuen superabit garrantzitsua izaten ari dira, baina gastu arauak haien aurrekontuak mugatzen ditu. Eusko Jaurlaritzak eta Nafarroako Gobernuak% 2,7ko gastu-araua adostu zuten Rajoyrekin 2019an, eta% 2,8koa 2020an (hau da, bere aurrekontua ez zen inola ere zifra horien gainetik handituko, Rajoyk gainerako autonomia-erkidegoei ezarri zizkien berberak; gehiago biltzen bada, zorra amortizatuko da).

Gastuaren araua% 2,9ra igotzeak Rajoyren gobernuaren austeritate dosi bera ontzat ematea da, 0,1eko igoerarekin. Gastu-araua sektore publikoak ekonomian duen pisua galtzea lortzeko oinarrietako bat da: baliabide eskasek zerbitzu publikoak hondatzen dituzte eta gizarte-prestazioen (pentsioak, etab.) murrizketa larriagotzen da. Hala, Espainiako Gobernuak bere gain hartu du Troikaren aurrekontu politika. Ezinezkoa da aurrekontuak sozialak izatea, aurrekontu-murrizketa hori bete behar badute.

Hori dela eta, ELAk uste du onartezina dela EAJk, Unidos Podemosek (biak alde bozkatuz) eta EH Bilduk (abstentzioa, beharrezkoa ere ez zena) austeritate politika hori babestea, Zapaterok eta Rajoyk 2011n ezarritako 135. artikulua ontzat ematen baitu. Kongresuan onartutakoak EAEko eta Nafarroako erakundeen aurrekontu mugak ezartzen ditu datozen urteetarako. Horrek dakar autogobernuari egindako erasoak naturalizatzea, eta Hego Euskal Herrian politika propioak egitea debekatzea.

Ez dago berritasunik EAJren jarreran, bere ohiko jarrerarekin koherentea, austeritate aurrekontuen politiken aldekoa. Gogoratu behar da alderdi horren botoak beharrezkoak izan zirela Rajoyren egonkortasun helburuak onartzeko. Hala ere, EH Bilduk Calviño ministroaren helburuei argi berdea emateko egin duen justifikazioa bereziki kezkagarria da; oso azalpen partziala da, eta eragin mugatua du, superabita duten udalek beren inbertsio iraunkorrak handitu ahal izan ditzaten. Malgutasun txiki hori lehendik ere badago, baina oso mugatuta dago legez.

ELAren ustez, aurrekontu politika aurrerakoiak aurrera eramateko eta euskal erakundeen aurrekontuak Madrilen erabakitzea eragozteko, ezinbestekoa da Aurrekontu Egonkortasun Legea indargabetzea, edozein indar subiranista edota aurrerakoirentzat lehentasunezkoa izan beharko lukeena.