Salatu dutenez, lehen konfinamenduaren ondoren, Osasun Sailak ez du plangintza egokirik jarri martxan, ezta birusaren balizko berragerraldiei bermeekin aurre egiteko beharrezko errefortzurik ere. "Osasun publikoa ez da indartu. Gogoratu behar da birusa agertu zenetik lan karga biderkatu dela eta inoiz baino beharrezkoagoak direla iristen ez diren errefortzu horiek", gaineratu dute.

Sindikatuaren arabera, kolapso berri baten aurrean gaude, eta ezinezkoa da asistentzia-jarduera guztiari aurre egitea. "Horrela, martxoan gertatu zen bezala, jada ezin da denera iritsi, eta horregatik hasi dira programatutako eta/edo presazkoa ez den ohiko arreta atzeratzen. Atzerapen horiek ondorio larriak ekar diezazkiekete herritarrei, eta, zalantzarik gabe, agerian uzten dute gure osasun-sistemak, egungo berragerraldiaren aurrean, ez duela baliabide nahikorik herritarrei arreta emateko premiei erantzuteko", azpimarratu dute.

Hala ere, ELAk argi du pandemiak agerian utzi dituen gabezia guztiak egiturazkoak direla eta aspaldikoak direla. "Ez dira birusak sortutako arazoak, eta ez dira desagertzearekin konponduko. Birusak egin duen gauza bakarra agerian uztea izan da, argi eta garbi, eta baita larriagotzea ere, baina inola ere ez sortzea. Urteak daramatzagu egiturazko arazo horiek salatzen, baina Osasun Sailak ez du arazo horiek konpontzeko borondaterik erakutsi", azpimarratu dute.

Gauzak horrela, uste dute egiturazko arazo horiek egiturazko konponbideak ere behar dituztela:

• Plantillaren dimentsioa ez da egokia dauden beharrei erantzun egokia emateko. Urteak daramatzagu egiturazko plantillan 5.000 plaza formalki sortzeko eskatzen. Argi dago pandemiaren etorrerarekin plantilla handitzeko behar hori biderkatu egin dela.
• Behin-behinekotasun tasa onartezinekin amaitu behar dugu: plantillaren %40tik gora. Azken urteotan, ez da Eusko Jaurlaritzak irtenbidea emateko borondaterik izan.
• Azken urteetan aplikatutako murrizketak mantentzen dira: garapen profesionala, Itzarri, erretiro-sariak. Gainera, lan-baldintzen akordioa 2009an iraungi zen eta ordutik ez da beste bat negoziatu.
• Pribatizazioekin amaitu behar da: anbulantziak, garbiketa, sukaldea, mantentze-lanak... Publifikazioa bultzatu behar da, eta zerbitzu gehiago ez direla pribatizatuko bermatu.
• Eta hori guztia egiteko, ezinbestekoa da osasun publikoan inbertsioa handitzea, batez ere lehen mailako arretan. Osasunean egindako inbertsioaren bilakaera oso negatiboa izan da azken urteotan, BPGari dagokionez. 2010ean, BPGren %5,3 Osasun Sailera bideratu zen. 2020an %4,8ra jaitsi da.

Gauzak horrela, berretsi dute ez dela kontaktu bakar bat egon Osasun Sailarekin grebak publiko egin zirenetik, eta, jakina, ez dagoela proposamen bakar bat ere mahai gainean. "Egoera larria da eta berehalako neurriak behar dira", azpimarratu dute. Hori ere eskatuko dute biharko (azaroak 12) greba egunean, Osakidetzako gainerako sindikatuekin batera.