Joan den ekainean ELAk ohartarazi zuen Zegona Euskaltelen sartu zela bi helburu argirekin: kostuak murriztu eta etekinak puztea. Sindikatuak salatu egin zituen zuzendaritza berriak erabaki zituen kaleratzeak (aurrez ere lanpostuak amortizatzen ari baziren ere), eta Eusko Jaurlaritzari galdegin zion esku har zezala, baina hau ez zen gertatu.

Orain jakin dugu Zegonak zuntz optiko sarea saldu nahi duela. Hau gertatuz gero oso larria litzateke, azpiegitura hori baita Euskaltelen aktiborik nagusienetakoa. Eta ezin dugu ahaztu konpainia hau diru publikoari esker sortu zela.

Ez dago zalantzarik Zegonaren asmoen inguruan. Euskaltelek 2018ko ekitaldian 92 milioi euro irabazi arren, edozein funts putreren jokabide bera du: Etekinak maximizatzea, kosta ahala kosta. Kontua da nork eragotzi dezakeen hori Euskaltelen, gure herrian enpresa oso garrantzitsua eta estrategikoa izanik. ELAren ustez hori egin behar dute enpresa pribatizatzera eta ondorengo desinbertsiora eraman zuten erakundeek, hau da, Eusko Jaurlaritzak eta Kutxabankek. Ez dago aitzakiarik.