ARGIA.eus

2019ko abenduaren 10a

Eragileen plaza!

SORTU KONTUA
ELA klase sindikatu abertzalea da, 1911n sortua eta egun 100.000 afiliatu dituena.
2019-12-02 17:59
ELAko Irakaskuntzaren arduradunek, Miren Zubizarretak eta Uxue Mingok, Eusko Legebiltzarrean agerraldia egin dute abenduaren 2an; eta, Jaurlaritzaren azken urteotako murrizketa-politikak kritikatu ondoren, honako eskakizun hauek plazaratu dituzte: hezkuntzan egiten den inbertsioa Europako batez bestekoaren pare jartzea, plantilletako behin-behinekotasuna %6ra jaistea, gaur egun jardunean dabiltzan langileen enplegua finkatzeko benetako aukerak ematea, ratio-politika aldatzea (%10 gutxitzea), lanpostu nahikoak sortzea, aurre-erretiroa erraztea eta pizgarriak ematea, eroste-ahalmena berreskuratzeko pausoak ematea, hezkuntza-erreformen aldeko erabaki gehiagorik ez hartzea, eta euskalduntze-bidetik aurrera-pausoak ematea.

 Era berean, ELA-ordezkariek eskatu diote Eusko Jaurlaritzari sektoreko langileen negoziazio kolektiborako eskubidea errespetatzeko, eta negoziazio-mahaiaren ardurapeko negoziazio-gaiak Jarraipen Batzordera bidaltzeari uzteko, jokabide hori erabat antidemokratikoa eta askatasun sindikalen eta negoziazio kolektiboaren aurkakoa baita.

ELAko ordezkariek beren agerraldian salatu dutenez, Eusko Jaurlaritza 2009tik hona krisiaren aitzakiaz baliatu dela zerbitzu publikoak, orokorrean, eta hezkuntza publikoa, zehazki, deskapitalizatzeko; eta horrek ondorio larriak eta murrizketak ekarri dizkio hezkuntza publikoari.

Zehazkiago, hurrengo hauek dira ELAren salaketak:

  • *Hezkuntza Sailak muturreko ratio politika aplikatzen jarraitu du. %9,1eko ratio gehikuntza mantendu da, eta ondorioz 1846 lanpostu gutxiagorekin funtzionatzen dute ikastetxeek.

  • *Behin-behinekotasunaren maila ikaragarriak mantendu dira (%28-%38 eta %65-%70 artekoa sektoreen arabera), aldarrikatutako %6tik oso urrun.

  • *Eros-ahalmenaren galerak %8 eta %15 bitartekoak dira.

  • *Aniztasuna eta hezkuntzaren beharrizan bereziak ondo lantzeko baliabide nahikorik gabe gaude oraindik ere.

  • *Erretiroa errazteko neurrien murrizketak beren horretan jarraitzen dute (erretiro primak, jubilazio aurreratua).

  • *Hezkuntza-erreformek dakartzaten hezkuntzaren zentralizazioa, ideologķa atzerakoia eta hezkuntzaren merkantilizazioa ez dira eten (LOMCE-Heziberri).

  • *Euskararen zabaltzea eta erabilera hizkuntza-ereduen bidez mugatuta dago.

  •  

     

 

Artikulu hau egilearen RSS jariotik automatikoki ekarri da hona. Baliteke jatorrizko artikulua luzeagoa izatea, eta hemen irakur dezakezu.