51 urteko langile bat larriki zauritua suertatu zen atzo arratsaldeko 18:20ak aldera Anoeta estadioko lanetan ari zela 20 metroko altueratik erorita. Lehenik eta behin, ELAk bere babes eta elkartasun osoa adierazi nahi die langileari, hala nola bere senitarteko eta lankideei. Era berean, Osalan eta Lan-ikuskaritzari istripuaren nondik-norakoak eta ardurak argitzeko ikerketa sakona ahalik eta azkarren egin dezaten eskatzen due.

ELAk etengabean salatu ditu Anoetako berritze lanetan ari diren langileen lan-baldintza kaskarrak, non lanen lizitazio baxua eta hauek bukatzeko denbora-epe estua lanegun amaigabe, gehiegizko lan-erritmo, segurtasun neurri falta eta ez-betetzeetan bihurtzen diren. 18 enpresa salatu ondoren, soldatetan 4,5 miloi euroko zorra, 200 langileren dokumentazio faltsutzea, eta 250.000 euroko isunak frogatu ahal izan ditu sindikatuak.

ELAk oroitarazi nahi du laneko ezbeharrak ez direla kasualitatearen kontuak, baizik eta etekin ekonomikoak langileen lan eta bizi-baldintzen aurretik jartzeko lojika neoliberalaren ondorio direla. Gipuzkoan azpiegitura handietako inbertsio publikoa lehenesten da bertako eraikuntza, gestio eta mantenuan aritzen diren langileen lan baldintzen kaltean, pribatizazio, externalizazio eta azpikontratazioaren bitartez prekarietatera kondenatuz.