Azaroan, lan gatazka gogor baten ondoren, gehiengo sindikalak eta patronal nagusiak akordio bikain bat sinatu zuen. Akordioan jasotako oinarrizko edukietako asko ikastetxeetan aplikatzen ari dira dagoeneko, besteak beste galdutako erosi ahalmenaren ia erdia berreskuratzea suposatu duten soldata igoerak edota lan kargak arintzeko ordu osagarriak eta lanaldi murrizketak.

Azaroko akordioa jarraituz, patronalek eta sindikatuek birkokapen akordioa hitzartu eta sinatu zuten Hezkuntza Sailarekin. Honela, matrikulazio jaitsieragatik lanpostua gal zezaketen langileak birkokatzeko irizpideak, baldintzak eta prozedura itxi zituzten.

Greba amaierako akordioan erretiro partziala hartzeko eskubidea jasotzen da langile guztientzat. Honekin batera % 100ean eta lan kontratu mugagabearekin errelebistak kontratatzeko beteteharra dakar, zeinak birkokapenerako irizpide objektiboak ezartzearekin batera lanpostua galdu dezaketen langileak birkokatzeko bermea suposatzen duen.

Hezkuntza sailarekin sinatutako akordioak, Sailak erretiro partzialak errazteko eta birkokapena ahalbidetzeko, erretiro hauen kostua bere gain hartuko duela jasotzen du beti ere, patronalek eta hauek ordezkatzen dituzten ikastetxeek lanpostua galtzen duten sektoreko langileak adostutako erizpide objetiboen bitartez birkokatzeko konpromezua eta betebeharra bere gain hartzen duten bitartean.

Patronalek birkokapenaren inguruan sinatutakoa ez dute bete nahi. Gobernuaren finantzaketa jaso nahi dute erretiro partzialen kostua ordaintzeko, baina lanpostua galtzen duten sektoreko langileak erizpide objetiboen bitartez birkokatzeko konpromezua bete gabe, beren aldebakarreko kontratazio politikari eutsiz. Azken batean, birkokapenaren inguruan adostutakoa ez du bete nahi.

Pasa den astean sindikatuek deitutako mobilizazioetan jakinarazi zuten, akordioak betez birkokapena ahalbideratzeko aldebakarreko pausoak ematen jarraituko zituztela. Zentzu horretan, gaurko, lanpostuak esleitzeko zeregina duen birkokapen batzordeko zein birkokapen akordioaren betearazpena bermatzeko lana duen jarraipen batzordeko bileretara deitu zituzten sindikatuek Hezkuntza saila eta patronalak.

“Gure harridurarako, deialdi honen aurrean, eta beste behin ere birkokapen akordioa ez betetzeko intentzioarekin, patronalak mahai negoziatzailea deitu du sindikatuok birkokapen eta jarraipen batzordea deitutako egun berdinerako eta birkokapenaren inguruko inolako planteamendu aldaketarik edo proposamenik egin gabe”.

Patronalek bileretara ez agertzea erabaki duten bitartean, greba amaierako akordioa sinatu zuten sindikatuak eta hezkuntza saila bertaratu dira.

Hezkuntza Sailak jarraipen batzordea formalki osatzeko pausoak emateko konpromezua hartu du eta argi adierazi du gaurkoan birkokapen akordioa bere osotasunean ulertu behar dela, eta birkokapena gauzatzen ez bada erretiro partzialen finantziaketarik ere ez dela egongo.

Sindikatuek, patronalei greba amaierako akordioan jasotako eduki guztiak, eta bereziki birkokapen prozedura eta helburuari dagozkionak, adostutako terminoetan bere gain hartu, Lan hitzarmenean txertatu eta betetzeko galdegiten diete. Era berean, Hezkuntza Sailari birkokapen akordioa betearazteko parte hartze aktiboa izan dezala eskatzen dio.