2020-12-29 15:56
Sindikatuak kezkatuta agertu dira Lehen Arretak pairatzen duen baliabide eskasiagatik eta kolapso arriskuagatik, COVID txertoari aurre egin behar dion heinean. Egoera honi erantzun asmoz, abenduaren 30ean mobilizazioak egingo dira lantokien aurrean.

Bizi dugun egoeraren larritasuna ikusita eta baita Osakidetzak bizi dituen arazo larrietarako konponbiderik eza ikusita, eta kontutan hartuta Osakidetzaren Zuzendaritzak berak, Sailburuarengana bideratu gintuela argudiatuz gure aldarrikapen batzuk bere eskumenetatik kanpo daudela, joan den abenduaren 15ean, premiazko bilera bat eskatu genion Osasun Sailburuari. Eskaera horren ondorioz, gaur bilera telematiko bat izan dugu berarekin.

Sindikatuek bileran egiaztatu dute, beste behin ere, asmo oneko adierazpenetatik harantzago eta etorkizunean egingo diren planteamenduei buruzko balizko negoziazio borondatetik harago, gaur egun, ez dagoela mahai gainean inolako neurririk Osakidetzak dituen egiturazko arazoei irtenbidea emateko. Eta hori, gure historia gertuko osasun krisirik larriena pairatzen ari garen bitartean.

Beste behin salatu dute Osasun Sailak eta Osakidetzak berak sindikatuekiko erakusten duten gutxiespen sistematikoa. Izan ere, negoziatzeko borondaterik ez izateaz gain, langileei bete-betean eragiten dieten hainbat gaien berri dugu komunikabideen bidez. Behar den informazioa ere ez zaigu helarazten.

Horren azkeneko adibidea COVID txertoa da. Osakidetzako langileak hasi dira lehen kolektiboei txertoa jartzen, eta haiek ere lehentasuna daukate txertoa jasotzeko. Bada, ez zaigu informaziorik eman prozesuari buruz, eta ez dakigu zein den Osakidetzako langileei txertoa jartzeko plangintza ere. Hala ere, komunikabideei bi gaien inguruko informazioa helarazi zaie.

Gogoan izan behar da orain hasten den txertaketa-prozesua erronka bat dela osasun-sistemarentzat, bere tamaina eta iraupena kontuta hartuta; are gehiago kontuan hartzen badugu Lehen Arretak bere gain hartu behar duen beste zeregin bat dela, eta arreta maila horrek urteak daramatzala gutxietsita eta gainkargatuta, eta azken hilabeteetan kolapsoaren ertzean kokatu dela, bere zereginak ugaldu egin direlako: PCRak, baheketa masiboak, gripearen txertaketa, COVID txertoa, etab.

Are gehiago, bileran Osasun Sailburuak uko egin dio Osasun Sailaren aurrekontu-proiektuari buruzko hainbat galderei erantzuteari, Legebiltzarrean eman beharreko azalpenak eman dituela argudiatuta. Hala ere, gogorarazi behar da Osakidetzan inbertitzen den diruak eragin zuzena duela langileen lan-baldintzetan eta herritarrei eskaintzen zaien arreta kalitatean.

Eta testuinguru horretan, berriz ere salatu dugu Mahai Sektorialean ez dela ezer negoziatzen. Bileren edukia eta egutegia Osakidetzak erabakitzen ditu aldebakarrez, eta mahai gainean jartzen dena aldez aurretik hartutako erabakiak dira. Osakidetzak erabakitzen du zertaz eta noiz hitz egiten den. Hala, Osakidetzaren egiturazko arazo larriei irtenbidea emateko benetako negoziazioa eskatu diogu Osasuneko Sailburuari, pandemiak inoiz baino gehiago agerian utzi dituen gabeziak direlarik.

Azpimarratu dugu beharrezkoa eta premiazkoa dela gure aldarrikapenei heltzea: osasun publikorako aurrekontu-partida bat, EBko batez bestekoaren parekoa, horren %25a Lehen Arretara bideratuz; plantilla handitzea, egiturazko plantillan txertatuz iruzurrean ezkutatuta dauden lanpostuak; behin-behineko langileak kontsolidatzea; murrizketa guztiak lehengoratzea; pribatizatutako zerbitzuen rebertsioa; eta langileen osasuna eta segurtasuna bermatzeko neurriak.

Aldarrikapen horien harira, eta lan zentroetan bizi den egoera larria salatzeko, abenduaren 30ean, 11:00etan, elkarretaratzeak egingo dira Osakidetzako lan zentroetan, mobilizazio-dinamikari jarraipena emanez. Osakidetzak ez baditu aurrerapausoak ematen eskatutako norabidean, mobilizazioak areagotuko dira.

Artikulu hau egilearen RSS jariotik automatikoki ekarri da hona. Baliteke jatorrizko artikulua luzeagoa izatea, eta hemen irakur dezakezu.
ELA klase sindikatu abertzalea da, 1911n sortua eta egun 100.000 afiliatu dituena.