ARGIA.eus

2020ko abuztuaren 06a

Eragileen plaza!

SORTU KONTUA
ELA klase sindikatu abertzalea da, 1911n sortua eta egun 100.000 afiliatu dituena.
2019-07-19 12:08
Azken urteotan, etengabe andeatu dira gure lan-eskubideak eta eskubide sozialak, onetsitako lan-erreforma segidaren bidez, baita Euskal Herri osoko zerbitzu publikoetan aplikatutako murrizketa-politikaren bidez ere.

Nabarmen aldatu da lan-harremanen eredua: enpresen alde bakarreko boterea handitu da lan-baldintzak ezartzeko, kontratatzeko eta kaleratzeko orduan. Baiezta daiteke lan-eskubideen bereizketen rol orekatzaile eta konpentsatzailea suntsituz joan dela erreformaz erreforma.

Hori gorabehera, ELAko zerbitzu juridikoek egunero baliatzen dituzte erreformak utzitako zirrikituak, epaitegietan garaitzeko. Argi daukagu ekarri duten malgutasuna gorabehera, enpresek ezin dutela zigorgabetasun osoz aritu, eta beren erabakiak judizialki kontrolatzea saihestu. Gure zerbitzu juridikoa, garai hauetan, ezinbesteko tresna da lan-prekarietatearen kontrako borroka estrategikoan dabilen sindikatuaren ekintza sindikala osatzeko.?

Azken urteotan aplikatutako murrizketa-politikek ekarri dute zerbitzu publikoen kalitatea okertzea, baita lan-baldintzena ere. Datuek beraiek argi uzten dute: Enpleguaren suntsiketa %?14 ingurukoa da, behin-behinekotasunaren tasa %?35etik gorakoa, erosahalmenaren galera %?16 ingurukoa, estrategia pribatizatzaileak eutsi egiten dio, ez da murriztu soldata-arrakala… Erabilitako koartada ia beti da Estatuko oinarrizko legeria bete beharra, baina egia da aitzakia hutsa besterik ez dela, eta egoera hau konpontzeko borondate politiko errealaren eza ezkutatzen duela.

Testuinguru honetan, ELAko zerbitzu juridikoek sententzia garrantzitsuak irabazi dituzte; besteak beste, Osakidetza behartzen duena bere plantilla ibilbide profesionalagatik zorpetzen duen soldata ordaintzera; Eusko Jaurlaritza behartzen duena Justiziako langileen lan postuak baloratzera, 2012tik eginda egon behar zuena, eta berriki ateratako sententzia, Nafarroako Gobernuari aholkatzen diona Foru Poliziako 750-800 agenteri 1.000 euroko batezbesteko soldata-atzerapenak ordaintzera. 150 milioi euro baino gehiago guztira.

Kasu horiek hainbat elementu dituzte denen artean, ekar dezaketen guztirako kopuruaz gain. Lan-eskubideen urraketa argi batez ari gara; Eusko Jaurlaritzak eta Nafarroako Gobernuak borondate negoziatzaile ezgauza erakutsi dute, eta horrek sindikatua behartu du auzitara jotzera murrizketa horiei buelta emateko, alde bakarrez aplikatuak eta inolako legezko justifikaziorik gabeak.

ELAk argi du kalitatezko zerbitzu publikoak lan-baldintza onekin bakarrik direla posible. Horregatik, urteak daramagu salatzen, mobilizatzen eta eskura ditugun tresna sindikal eta juridiko guztiak erabiltzen lan-murrizketak leheneratzeko. Eta horrela jarraituko dugu, zerbitzu publikoen defentsa ez baita soilik hor lan egiten dutenena, Euskal Herrian bizi garen guztion ongizateari eta bizi-kalitateari eragiten dio.

Artikulu hau egilearen RSS jariotik automatikoki ekarri da hona. Baliteke jatorrizko artikulua luzeagoa izatea, eta hemen irakur dezakezu.