Grebaren helburua enpresa-hitzarmen bat lortzea da, Nafarroako Ehungintzaren Hitzarmena erreferentziatzat hartuz; eta horren bidez Navarplumako langileen baldintzak duintzea. Gatazka hasi zenetik enpresa saiatu da greba-eskubidea urratzen; eta horretarako, Greba Batzordeari enpresan sartzea galarazi dio, grebalariak ordeztu ditu... Jarduera horiek guztiak salatuak izan dira Lan Ikuskaritzan.

Navarpluma enpresak etekinak sortzen ditu, bere finantza-egoera oso ona da. ELAk aztergai izan ditu Navarplumaren kontuak eta enpresaren ustiapen-emaitza, 2018ko martxoaren 31ko egunekoa (eskueran izan dugun azken datua), eta etekinak 1.376.760 eurokoak ziren. Oso deigarria da pertsonaleko gastuak enpresaren gastu guztien %3,5 bertzerik ez direla, eta urte bakar baten epean portzentaje hori %5etik %3,5era jaitsi dela.

Navarplumako langileek dei egiten dio Nafarroako Gobernuari gatazka honi konponbideren bat bilatzeko. Alde horretatik, ELAk bilera eskatuko dio Ekonomia Garapeneko Departamentuari gatazkaz aritzeko. Era berean, ELAk zera oroitarazi nahi du: joan den urriaren 8an Sodenak eta Nafarroako Enpresarien Konfederazioak (CEN) lankidetza-akordio bat izenpetu zuten, eta horren arabera Enpleguaren Nafar Zerbitzuak parte hartzen du programaren finantzazioan. Navarpluma enpresak diru-laguntza publikoak jasotzen dituenez, zentzuzkoa da eskatzea Nafarroako Gobernuaren esku-hartzea, ELAren ustez.