Emakumeak kaltetuenak

Behin-behinekotasun tasa % 25,3koa izan zen Nafarroan eta % 22,6koa EAEn. Tasa horrek eragin handiagoa izan zuen emakumeengan, kontratuen ia herena Nafarroan (% 31,1) eta % 26 EAEn. Gizonen artean, berriz, ehuneko hori % 19ra jaitsi da bi erkidegoetan; beraz, emakumeek gehiago sufritzen dute behin-behinekotasuna eta horrek dituen ondorioak jasaten dituzte.

Gainera, datu esanguratsu bat eman du: lanaldi partzialeko kontratuen arteko aldea nabarmena da gizonen eta emakumeen artean. 2020ko datuen arabera, gizonen % 5,8k soilik izan zuen lanaldi partzialeko kontratua, eta lau emakumetik batek (% 26) mota horretako kontratua izan zuen, hau da, tasa bost aldiz handiagoa.

Langabeziak adina du

Adinak ere berebiziko garrantzia du enplegua suntsitzeari buruz ari garenean. Datuen arabera, 44 urtetik beherako pertsonak izan ziren kaltetuenak. Ondorioz, gero eta alde handiagoa dago enplegu mugagabea dutenen artean, batez ere adin handiagoko pertsonak, eta biztanleria prekarizatuenaren artean, batez ere gazteak.

Erreformen berehalako indargabetzea

Bestalde, Mikel Novalek, sindikatuko Ikerketa arduradunak, aurreko hamarkadan onartutako lan erreforma eta negoziazio kolektiboaren erreforma lehenbailehen bertan behera uztea eskatu du, bai Zapaterorenak bai Rajoyrenak. Erreforma horiek prekaritatea zabaltzea ahalbidetu zutela eta langileak kaleratzea erraztu zutela azpimarratu du.

ELAk bildutako datuek erakusten dutenez, "erreforma horietan atzera ez egiteak milaka eta milaka langile kaltetzen ditu, langabezia eta prekaritatea pairatzen dituztenak, enpresen etekinak handitzeko asmoz”.

Irakurri hemen txosten osoa