Animaliak babesteko elkargunea osatzen duten elkarteek – Ekologistak Martxan, besteak beste-,  Livia López, Gasteizko Kirol eta Osasun zinegotziaren dimisioa eskatu zuten atzo usoen hilketa berreskuratzeko plana dela eta. Elkarguneak usoen kudeaketa etikorako proposamen bat egin zuen 2017an, usategiak eraikiz usoak kudeatzeko proposamenekin, baina egungo gobernu-taldeak “ez ditu inoiz Elkargunearekin proposamen horiek eztabaidatu, gai horri buruzko saio monografiko bat deitzeko konpromisoa hartu zuen arren”, azaldu dutenez.

Duela gutxi, Gasteizen bizi diren 400 pertsona inguruk bozkatu zuten Hobetuz programaren barruan hautatua atera den usoen kudeaketa etikorako proiektu baten alde, 2022-2023 urteetan egiteko, “argi utziz herritarren jarrera populazioa kontrolatzeko metodo gisa kudeaketa etikoari dagokionez, animalien hilketa bereizi gabearen aurrean”.

Azaldu dutenez, egungo ordenantzarekin ezinezkoa da usoak harrapatzea eta hiltzea, eta Udal Gobernuak usoen populazioa kontrolatzeko plan bat aurkeztu zuen Elkargunean. Plan horretan, Udalak bere kabuz jada erabakitako zenbait jarduera proposatzen ziren, eta, hain zuzen ere, 2022ko aurrekontuetan sartuta zeuden, besteak beste, usoak berriro harrapatzea eta sakrifikatzea. “Ez zuten kopurua zehaztu, baina planaren oinarri den aurretiazko azterketan argi utzi zuen populazioaren % 30-40 harrapatu behar zela proposatutako jarduketak eraginkorrak izan zitezen, hau da, urtean 1700-2000 animalia”, ikerketa horren arabera.

Hala ere, Udalak zehaztu gabeko uso kopuru baten harrapaketak eta hilketak abian jarri nahi ditu abendutik aurrera, “animaliak babesteko ordenantza bete gabe nola egin nahi duten azaldu gabe. Erabaki horrek eta hori hartzeko moduak tolerantzia onargarriaren atalasea gainditu dutela, eta neurri kirurgikoak hartzera behartzen gaituela, animaliak babesteko politikek Gasteizen atzera egin ez dezaten animalien bizikidetzari eta babesari buruzko ordenantzaren aurreko urteetara arte”. Halaber, “alferrikakotzat jotzen dute animaliak babesteko politikei buruz hitz egitea kirola eta osasuna bakarrik interesatzen zaizkion sail batekin, legegintzaldiko hiru urte hauetan erakutsi duen bezala”.

Azkenik, Elkarguneak uste du Kirol eta Osasun Sailak Gasteizen usoak harrapatzeko eta hiltzeko hartutako erabakiak “tolerantzia-muga gainditu” duela, eta horregatik Livia López Kirol eta Osasun zinegotziaren dimisioa eskatu du. Era berean, Gorka Urtaran alkateari eskatuko diote “ahalik eta lasterren sor dezala sail bat, edo zerbitzu bat, edo, gutxienez, animaliak babesteko unitate bat, gaian espezializatutako langileekin, eta sail, zerbitzu edo unitate hori Gasteizko Udaleko Kirol eta Osasun Sailaren organigramatik kanpo koka dadila”, eta, animaliak babesteko politikek Kirol eta Osasun Sailaren mende jarraitzen badute, “Elkargunea ezabatzeko eskatzeko mehatxua” egingo dutela. “Ez du zentzurik herritarren partaidetzarako foro horri eusteak, eta, beraz, Gasteizko Herritarren Partaidetzarako Erregelamendu Organikoaren 59* artikulua betez, Gorka Urtaran alkateari eskatu dio Udal Osoko Bilkurari proposa diezaiola Animalien Bizikidetza eta Babeserako Elkargunea desegitea”.

Horrekin batera, talde politikoei eskatu diete Gasteizko Udalerako hauteskundeetarako beren hauteskunde-programetan sar dezatela sail bat edo zerbitzu bat edo, gutxienez, animaliak babesteko unitate bat, gaian espezializatutako langileekin, eta sail, zerbitzu edo unitate hori organikoki osasun publikoko sailaren mende ez egotea.

Adierazpen osoa (gastelereaz) hemen.