Papresaren jarduerak herritarrengan eta ingurumenean sortzen dituen arazoak konpondu daitezela denbora luzez eskatzen aritu ondoren –herritarren arazoa dela dirudi ez hauen ordezkariarena–, Errenteriako Udalak iragarri zigun (2020ko uda) enpresarekin bilera bat egingo zuela arazoari modu orokorrean heltzeko. Udalak egin behar zuen txostena, aipatutako bileran landuko zutena, IAKri (Ingurumen Aholku Batzordea) jakinaraziko zitzaion aldez aurretik, ekarpenak egin ahal izateko.

Ondoren, Eusko Jaurlaritzak ere parte hartuko zuen bilera bat iragarri ziguten zalaparta handiz, erakunde horren partaidetza oso garrantzitsutzat jotzen baitzuten konponbideak bilatzeko. Bilera egin ondoren, arazo hori erakunde-mailan interes handirik ez izatearen sentsazioa sendoagoa dugu.

Aspaldidanik eskatzen ari gara arazo hori konpondu dadila; 2017az geroztik, udaleko Akustika Hobekuntzarako Planak jada ezartzen du Papresarako ekintza-plan baten beharra. Orain, bilerarako txostena ez digute eman agindu zuten bezala eta ez da egingo jakinarazi diguten bezala, bileran Papresak sortzen dituen arazo guztiei ez zaie heldu (gutxitu beharrean geroz eta handiagoa den trafiko astuna, arnasarik ez hartzera behartzen gaituzten usain nazkagarriak, tona handiko kamioiek bidegorria inbaditzeaz gain oinezkoentzat ere dakarten arriskua, etab.), eta hori guztia gutxi balitz, ez da hainbestetan aupatutako bileraren aktarik egin. Gertatutakoa hiru aldeen erabateko zorroztasun-falta dela ulertzen dugu, eta, beste behin ere, beste alde batera begiratzeko ahalegin argia, ingurunean bizi diren pertsonen osasunean zein ingurumenean ondorioak dituen gai batean.

Hitzak haizeak eramaten ditu, idatzita dagoena eta sinatu gabea dagoena paper bustia da, onartutako planetan hartutako konpromisoak ez dira betetzen, eta egoera hori jasaten urte asko eman ondoren, hain esperotako bileratik ez da aktarik egiten. Premisa horiekin, zer espero dezakegu gure ordezkariengandik?

Ikusitakoa ikusita, hau eskatzen diogu Udalari:

1. Papresarekin hurrengo jarraipen-bilerak egin aurretik, IAKri jakinaraz diezaiola, ekarpenak egin ditzan.
2. Bileraren akta egin dezala eta horren kopia IAKri bidal diezaiola.

La entrada Zenbat axola zaio Errenteriako Udalari bizilagunen osasuna? aparece primero en Eguzki Talde Ekologista.