2019-09-25 12:29
Gasteizko merkataritza eta ostalaritzan euskara erabiltzea sustatzeko kanpaina jarri du martxan Bai Euskarari Elkarteak; urrian zehar Bai Euskarari ziurtagiria duten Gasteizko dendetan euskaraz kontsumitzen duten bezeroek zozketa batean parte hartu ahal izango dute.
Nola parte hartu
- Euskaraz kontsumitu edo Lehen Hitza Euskaraz egiten duten bezeroen artean banatuko dira boletoak. Zozketaren boletoak urriaren 1etik 31ra arte banatuko dira Bai Euskarari ziurtagiria duten establezimenduetan.
- Hiru boleto eskuratu beharko dira, Bai Euskarari ziurtagiria duten hiru establezimendu desberdinetan.
- Hiru boletoen kodeak formulario honetan sartu azaroaren 3a baino lehen. Saria jasotzeko hiru boletoak entregatzea beharrezkoa da.
- Zozketa azaroaren 4an egingo da eta irabazleekin harremanetan jarriko gara.
Sariak
- 100 €-ko bono bat.
- 50 €-ko bi bono.
- Hiru harpidetza ALEA aldizkarian
- Lau bazkari/afari bi lagunentzat
Saridunek erabaki ahal izango dute Bai Euskarari ziurtagiria duten zein enpresatan erabili bonoak.
#LehenHitzaEUS kanpainaren barruan
Gasteizko #LehenHitzaEUS kanpainaren barruan kokatzen da ekimen hau. Horren helburua da establezimendu eta kontsumitzaile gasteiztarrei bide berriak irekitzen laguntzea, euskara baliatu beharreko aldagai gisa harturik. Hala, Gasteizko euskararen mapa osatzen joatea da kanpainaren muina, euskarazko kontsumoa errazagoa izan dadin.
Artikulu hau egilearen RSS jariotik automatikoki ekarri da hona. Baliteke jatorrizko artikulua luzeagoa izatea, eta hemen irakur dezakezu.
Bai Euskarari Elkartea ekarpen ugari egiten ari da urte hauetako ibilbidean, Bai Euskarari ziurtagiri bat baino askoz gehiago da. Gero eta eragin eta arrakasta handiagoa lortzen ari diren proiektuak, tresnak eta baliabideak lantzen, sortzen eta egokitzen ari gara Euskal Herriko enpresen eta profesionalen eskura jartzeko: Enpresarean (azoka, foroak eta telebista), Lansarean lan-ataria eta aplikazioa, Lanabes – Araban Euskara Lanean, jarraibide egokiak eta abar luze bat. Argi dugu gure ekarpena lagungarria izaten ari dela alor sozioekonomikoaren espazioak euskaraz betetzeko, eta horretan segitu nahi dugu. Euskaraz bizitzea, euskaraz lan egitea, ekitea, sortzea, berritzea, saltzea eta erostea, egunerokotasunean euskaraz normaltasun osoz aritzea posible bada, gure ongizatea handiagoa izango baita. Horra hor gure erronka.
