Euspot, Euskarazko Spot Lehiaketaren bederatzigarren ediziorako lanak aurkezteko epea amaituta, Publikoaren Sarirako botoa emateko aukera zabaldu da. Aurten, lehen aldiz, Bai Euskarari Elkarteak babesle bezala parte hartzen du eta Publikoaren Saria emango du. Gure helburua arlo sozioekonomikoaren espazioak euskaraz betetzeko eragitea izanik, estrategikotzat jotzen dugu ikus-entzunezkoen industrian eta gazteen artean ere eragitea.

51 spot aurkeztu dira aurten, inoiz baino zailtasun gehiagorekin sortutakoak, COVID-19aren krisiak eraginda. Zer dago janzten dugunaren atzean? izan da aurtengo edizioko gaia. Spotean nabarmendu behar izan dituzte moda azkarrak eragiten dituen ondorio negatiboak. Lehiaketaren helburua da ikus-entzunezko publizitate arloan euskararen erabilera hedatzea eta euskaraz lan egiteko gai izango diren profesionalen harrobi lana egitea.

Spot guztiak ikusi eta bozkatzeko aukera duzue hemen: https://euspot.eus/hemen-dituzue-51-spotak-ikusgai-eman-zure-botoa/